Blogs

Paaw Khua Ming Siainn kaenaw kong

  •         Miraw ccozah nynh 1927 te tan pali siainn kha a hung. Te khua takyh te imua innhaw ze lu kheit nae shaw cih oh cite, ccozah nynh kaw be pya aè. Tukeiccu siaimua shaw lanpaw kha rampi te khuabawi aè nynh ccaahpaw lu nin, lu thung a hoi aèpaw kha na ccaw lu kheit tuh siainn kae lang kae ngia ci aè zah aw, vog chiapah aè zah a ngia aè, tetuh lu kheit tuh a ua aè te siainn a kaé. Rampi aè nynh looh, ehang te maething phe rin aè zah a nung a paaw kha ramrya phe a-oy sah aè.

           Tute ci khyhze lu kheit sangmah siainn kaé sah ry khyh aè, Zamani (Germany) rhawkaw lang kha he oun soe cih aè cite phe a rih aè. Tukhyzemah ccaw ccangku cipaw hynh thae boi leipaw zah ry mawte mazi ry khyh aè. Thuaslamah Kae tuh myarya ka ccangkuh ry, Khozi Pachia nynh ngawrei oun ccangsah vae. A paan kha ccaw beih kae ccangkuh tynmyng cite tutu leih ka ho pya zah kum (11) he ka beih te A paan nynh, eih na rypaw tuh la ccangkuh cizah Rezua lang tuh oun shaw sah vae aè. Rezua tuin Bawda inn oun sapah aè zah 1931-34 February saw thangcia ka kaé zah tan pali ka aw. Ka tuanaw, ka nynaw a um.

         Ming aè nynh ccaw ccangkuh lang hynhcih arhi lya aè ze khaloe khaloe paw lang ccaw ka la ccangku rypaw kha Pachia maw nynh Amaw a beikpaw lang kha oun la ry zah oun la ko nawpaw vae ii cite ka ny. Pawccecize ccaw kha ccangkuleite ka la um zetuh Pachia cipaw kha khrouh ka la nyh lang khyh zah Ka paaw hawte silawkute nynh pou ka la hiin cih. Tukyalya bua thualeite Zotung minphuin aè blyn tuh Pachia beik oh cite hum nynh a hopah tu um vae langkhyh. Thing, Lung, Tui, Si aè kha Aw, Mia, Vog te a bog vae cih aè zah hose a ro temou Bawipaw Pachia tuh a nyh um cihae cipaw tuh ka ho kho vae khyh. Haekhaw Siabawi te Pastor aè nynh thua khokhyh aè, laanpi saw zah ccu te ccia a ru, tukeiccu tuh siainn ka la kaé rypaw te Amaw beik lang ka lung oun la tho sapaw tuh tua langze ngae-an langkhaw a um. Siainn ka ccangku lyahin bua, tan thung he ka ccangku tuh amaw bua oun beik saku, tukeiccuze ka tua vae.

          Ka ngawtaw lya kum kheit kum nin lungkhu ka ngoy zah Pachia nynh dannaw oun pya. Siainn kaé rynaw lungthing oun sang. Sia-imua sung taruh laku ze Amaw a beikpaw lang bua oun rae. Tukeiccu kae hynh Pachia Khozi nynh oun synria thyte i ka hiin ka ciku zah Bawipaw phu myarya ka e sah.

     

     

     

     

    Khua Ming