Blogs

Vazu te khophung phungpaw

  •                       Zotung hae nynh abawi hae ze a bawipaw zu te avawpaw nynh khophung lia kha lae hae za milu kya a voiku hae. Avawpaw nynh vazu soi kha ahuinku bia.E khophung te vazu soi law khiaku haepaw hynh phungpaw aum.

     

     

                         Khuin.. langma lya ze Nomaenung nynh ccapise lu 2 asah. Atawccaw ming tuh Paw Tang Pu te anaeitaw ming tuh Paw Tang Zaer aci hae. Zu la hoihae za mih uccaw parya ala hoi hae. Ah unung tuh Noe Lang Si anaeitaw tuh Noe Lang Dang la ci hae. Innkheiht lungkhu mih nung ry lu 5 te la um hae. Mih vawpaw haetuh loo la pho hae. mih zu haetuh boei la kua pa hae za he la phia haetuh lo lang mih vawpaw hae kalan Zuby la naw hae.. Zuby elang vaebu kha ccaw te ccangraphung py haeza amialang kha maetou latung hae. Mih vawpaw hae elang kha ccatang bu te awtui saw la tung pya hae. Boei phe kae phia vae, Inn lang oun thua cca vae hae sah cite bya la taw hae.  Zuby nynh -ccatang bu te awtui saw kha amaw la ae za, ccaw te ccangraphung pykuhpaw te maetou kha mih vawpaw hae la pya hae. Nae zu hae nynh zihaw zikuin oun rya hin hae sa ae ci oh la ci pya hae. Nae zu hae nynh zihaw zikuin oun rya hin hae sah ae ci oh la ci pya hae. Tetuh loo lang palei la rya vae hae. Mih zu hae nynh dou ang bua la rawkuhae za la phia hae te zuby tuh bua lanaw hae. Zuby nynh athuahuapaw vaebu mihvawpaw hae elang a ci haepaw kha ccapheih la ae zah, ccaw te ccangraphung pykupaw te maetou kha la pya hae zah, zihaw zikuin oun rya hin hae sa ae ci oh bua la ci pya hae. Zuby nynh paleih laling hae zah, loo lang tuh paleih la rya vae hae.

     

                          Tetuh mih zu hae nynh mithing phe la ria khin za, mih ngae phe la myn vae. Oun ry vae khyh hae za te ngawrei oun thuanua ry vae khyhae,  ah inn lang ki cca vae sih la ciku hae za boei te dou ang tuh la nung pyasya hae. Mih vawpaw haetuh ma loo la rya ry tae vae khyhhae za pawpaw te thua zema inn lang thua de cca vae sih cite inn lang la thua vae hae. Inn vaw la thua hae te mih nung kha teimou um hae la cihae tuh, zuby palei ae ko sa oh za naethua vae khyh oh. Kholae lang phe ki vae hae a ci pya hae. Mih vawpaw hae nynh palu la dehui hae za mihnulang te vyavya la phya hae. pou Si Nung te Dang Nung khekhe oun la ngaw hin oh cite lako hui hae. Mih zu hae nynh kae ning tuh nae ry lei vae opaw cihae za mua pou khung lang la ccue vae hae.

                       

        Thua kho vae khyh hynh sya...ccue te la ccuekhaw hae za lanpi kae thung khuanin phe sonaw kya khe lukheit nynh, Thing lang la tang za lukheit nynh mynlyh lang la tang hae za la buhae. Mih zu hae tuh te e mynlyh kya he thua haetuh aneitaw nynh a u mynlyh kya hae um hin sih la ci hae zah, a u nung nynh mynlyh thua khyh Tangphu te Tangzae la kha la ci zah po bua la ccue hae. Tuin te bua ccue khaw hae zah, lukheit nynh vawkhu lang tang za lukheit nynh due lang bua atang. Tetuh paw kyatecceih vae khyhae zah, aneitanung nynh due alui loukaw a u nung tuh roh la kyn hae. Ah innlang ki lang vae la cipahae za, ka nei tanung khuraw phezua vaepaw nge lang phe tang vae cih cite phe la mya vae.

                         

        Tuin te mih vawpaw hae nynh ah umkheit thya vae lang khyh oza, naning lukheit nynh ribung lang, lukheit nynh khophung lang oun tang ola, kae ning ma lukheit hynh vazu lang, luhkheit hyn saesia lang kae tang cih za Bawipi nin kya sya atungku vae oh la cihae. a u nung Langsi tuh khophung lang la tang za aneitaw Lang Dang tuh Ribung lang ala tang. Mih vawpaw hae tuh paw Tangphu tuh va zu  lang la Tang Za paw Tangzae tuh  saesia lang la tang. Te ribung Noe Lang Dang he oun paw tuh apaw kha va aw nynh phe la zu. Va aw tuh hynh te la ci, ka rang kya e apaw kha zu la ka sangsoi khatuh vazu te saesia elang hanpa hae ci zema va aw nynh pong la zu de vae. Tukeiccu nynh abawihaepaw nynh Ribung tuh puimaw nynh phe ae vae cite la lah bua ry vae khyhae. Ribung tuh va aw nynh phe ae vae, saesia ma la nang osi cihae za la ry vae khyhae. Khophung te vazu soi rou nynh law khia vae hae. Bawipi nin ze tung kuh vae osi aciku hae hawte, ah bawipaw nynh Khophung te Vazu soi alaw khia haepaw tuh paw Tangphu te Noe Langsi atungku naw haepaw. Ngalyn patuilaw- Saesia vau ....ngalyn be (sawbe) cite tyn khua hae za asah pya hae.

Lehrupaw`ae

0 Lehru