Blogs

SepiI hae phung paw

  • Sepi khua tuh zotung ram ze khua ala zua tynaw hae khua acihae. Ashe ny kho um vae 
    khyh. Phaephaw sepi aci kuh paw nynh khua ala zua cite atua de hae. Tuithang nung kong, pangbohpaw kong hynh sepi khua te alangkuh paw. Atuma akaw lang e asisamaw hae tualang paw 
    (qkd&dk;pum;) ashe te alaho hae paw bya;-

     

    (1)  Kae paw kynnaw;- sepi hae tuh kou la pong hae zah, sepi ccan vae azaw lya oh loo ram saw phung ccing akyn kou vae oh, kaepi nynh ade vae ngaw oh cite latho kuh hae za lade hae. Kaepi tuh athaw phe banglang lade hae za liaruite la leih ae za kholae lang po la dung hae.

     

    (2) lungpipi kynnaw ;- lungtu pipi bua akyntuh ngaw oh la cihkuh hae za, lungpipi tuh latou hae zah patae te la kyn hae.

     

    (3) maethae kynnaw;- Hynh tuh accaepaw maethae hynh asaw tua ngaw oh cite lu 20 te la kyn hae za lasaw hae. Tukou te lu (10) te lu (5)  te lu (3)  te lu (2)  te nya thya kou lukheit te lasaw hae tuh lukheit te kyn lang paw ci la ny hae.

     

    (4) maeccaw ku dou naw;-  ccawphuy pi (maeccaw ku alepaw) nynh ange ngaw oh za, adou tua ngaw oh cite ladou hae tuh ccaw phu pi nynh pung chih lang la deih hae.

     

    (5) zangtui awku naw ;-   Sepi ccan vae ablyn te ah zangtui ah awkuh tua ngaw oh. Ccaria (awmif;BuD;) kya hein asang tua ngaw oh beih kho ve la cih kuhae za, lukheih ccezung te la aw hae. Awkuh taryh it taryh la cihae. Ccaria akhan kuh lathua tuh aa!  A it hae paw thua vae khyh achih haepaw ci lanynh hae za la um taw hae.

     

    (6) Ngaraw sah naw;- Leisaw vaw kya ngaraw lasah hae zah, lunglu tharui kha ru lang ala bua hae. Tuili kya- e tuithangnung ccaw tuh larui zap he la chih vae. Tuivawlang ae ae laphalyh paw la muih hae tuh, ezou! Tuithangnung ccaw phe achia vae oh, ccueccavae osih cite kholae lang la ccue hae. Ngasaw lathung kuh hae za la ae takaw bang, vyavya la voi sabang kya hein tuithangnung tuh la rah vae. "mesi" aryn oun koi la, Bawi he aryn oun koi la suadan dang lang ka dang Nung" cite la sia za Bawi he te mesi loram kya um haepaw ngaraw sak haepaw inn blyn laeming nynh la dung bia hae. Mesi te Bawi he tuh Sepi hae umnaw hae laephi nynh athua.

                Ngaraw asakbua lei hae paw khonahaw tuh laeming nynh dung bua khyh hae.