Blogs

Luichaw Te Law Aa

  •                        Langmaw lya ngawrapaw lukheih va ung, Aming tu Luichaw acikaw. Ate a nung a paw ry aumpaw liaccanung Law Aa hae tuh myarya a sungsah hae luichaw te Law Aa aryku hae cipaw khe Law Aa apaw nynh athae tuh hynh te Luichaw tuh ngawraw thua zah, Arubungpaw tou ameengaw cite aho. Ate Liaccaw Law Aa tuh ccavae ccahngopaw Angia zulang ady vae ae, Te tuh Law Aa nynh a sakheihpaw Luichaw kha hynh te ahopya ccahngopaw Angia zulang  ka paw ka nung hae nynh aechia pa vae ci ae, tuhthuakiaccuze na kae bua cihza namaw kha masaty lang mee apya cihae pawtynre apya aeze mah phe nae mahcihza, kae tuh Law Aa boipaebuapaw nynh kary nae ci ngaw cite bya aho pya.

     

                         Te Law Aa tuh Angia zulang ccango lang akae vae, Luicaw mah a cceihbua. Masatylang Luichaw kha mee apya ty ae Seteepaw,  Nawtungpaw, Mahra tungpaw blyng pya aezah Luichaw nynh Phe amya te vapaw mah nary cite akhia hae tuh Luichaw nynh Law Aa boipae puepaw nynh ka ry cite hozah Law Aa boipae puepaw tuh apya ae. Tuh koute Luichaw te asee hae tuh a ki vae ae. a ki lya vapi azua aetuh, Tuh e Law Aa boipae puepaw tuh phe alou, te tuh Luichaw nynh a see hae kha ccung oh lah cite ahopya hae te a see ae nynh boipae puepaw kae ccungpangaw khyh cite a khung ae atetuh Luichaw nynh law aphua (sezung thola Luichaw zaria umla Law Aa niccaw seepangaw phupaw cihlaw he a sah tuh a see hae he ccung hae zah, phe muih hae zah, innlang aki vae ae. ate Law Aa paw lokya leimyn thing a lepipaw aung a sangkholang paw yn khyhzah, Luichaw kha thingpaw sanglanga chuiku, Luichaw tuh awkhuatakaw te thozah, Leimyn thingkha sang Law Aa paw tuh innlang te samaw, Aw chiate athua vae. Luichaw tuh Leimyn thingku kyate dolangzah Ccangokhua kya e Law Aa boi kua paw a muih tuh alungdezah, law a phua ( Luichaw kaenaw thingkukya te Law Aa ungnaw ccango khua ka muih cite law a phua, ate Law Aa paw tuh law ngaezah pung ngawphu kuh te Luichaw tuh thingpaw asangkou te rungzah inn lang aki vae.

     

                        Ate Law Aa paw tuh aethozah Luichaw ung vae khyh cipaw a nynh te inn lang a ki vae. Vaekheih tuh Luichaw tuh vaelang cceih zah, Vaetua, Naw rezah ae deituh Law Aa paw langpi kya aungpaw amuih tuh ahungma langpi kya na ung Luichaw rubung aede ngaw aciku tuh Law Aa paw amaethahza pheccue vae ate Law Aa ae tuh aepaw ccakan aezah Bahaw athae paw kha Luichaw nynh amuih tuh Law Aa te accaw kha inn lang hoi ae zah vok a chia pya ae.

     

                      Tuh e ning tuh hynh te bya ahoku hae, Sawde lang Angia nae hy cihzah Maethe te nae kaw cih acipaw Luichaw nynh Law Aa te accaw aekha Luichaw nynh asee hae Phawvoi, Ccaw lohkha aphu sapya hae. Nawkheih acite luichaw nynh a ngia sawde lang ahy za, Luichaw te Angia tuh saw adee hae, te Law Aa tuh boikua za atu nin tuh khua nin thya ning a thua. Luichaw nynh Angia achia cite Law a sah paw kha aninung nynh thaezah vangpaw law mah na sah aci, kaditaraw ningze ka ninung athuipaw aci, Te tuh maethae accae aromawze Luichaw nynh Law Aa kha thangccin te yn kozah accawkha laza phe deihnaw kou Luichaw te Law Aa tuh accuekhae ku hae, te khuazi kya sungke due kuh hae zah luning te ah ihkheih hae te cceih ae zah, ccungsung te Rovaw laku lungphe vawlang asyhaepaw ccunuh lungphe vawlang atucia aung ung te, Luichaw te Law Aa tuh Lotu acipaw ae pavaw lang nynh avatang hae, tuh e pavaw hae tuh pise tuh Aa Aa cite siazah, Nopi tuh Chaw Chaw cite nynh koku te asia ae atu nincia.

    By:Paw Sam Tun Lian

Lehrupaw`ae

0 Lehru