News Home » World » Malay te India Ung Hae Paw Zotung Ccaawno Hae KaLang Thungpang Thae Sah Naw

Around the World

Malay te India Ung Hae Paw Zotung Ccaawno Hae KaLang Thungpang Thae Sah Naw

Zotung Minphuin 31 Sep 18

Malay te India um paw zotung ccaawno hae kalang thungpang thae saku naw. Raering ku myarya ho paw athua keiccuze e ccaw hynh beibeih lah ria oh sih.

Akhuarang ryachi vawsaw keiccuze ram 2 naw athua paw India te Malay lang cciate vaelua paw zotung ccaawno hae abang tuh UN ccungccaw athua oh. Atulya UN kong lang dolang ze ahooy paw thungpang ung  vae khyh. 2012 kum te akawlang kya ram 2 naw lang lah thua kho bua vae paw zotung ccaawno hae tuh ram 3 naw lang pakheih athua vae hae.

Thuasalamah atu vae tuh ram 3 naw lang pou hynh myarya maw aru vae. Tuh thua keiccuze  abang tuh khualang bua ki hae paw mah ah ung hae. Te abang tuh khua lang kizah ram 2 nawlang bua a cceih thui paw mah myarya alung oh. E kong hynh raering kunaw kae ho pya ry oh.

Atu lya UN kum saepi ngaw te India ram New Delhi kya khuasa hae paw Salan( FALAM) hae innbyng tuh Australia konaw form atin ku hae paw liate Australia lang ccia nawlang Embassy te interview kyate ahobou paw miakaw marya alyn ku vae hae. Visa mah phe mue vae hae paw. Thusalamah UN nynh Exist Permit pya ry khyh hae keiccu Australia lang ccia kho lei te atu cia ah ung hae.

Paw keiccu mou UN nynh Exist Permit apya khyh hae ci lang ze ” accaaw hae nynh khualang lah ki hae zah khualae athua lya hae e sakhung tuh Facebook kya lah tin hae.( khuatee maw taraw kya kae cciadue oh cite ataw hae paw taung kya khungku hae paw) Tuh e tuh UN nynh phe lah muih hae zah Exist Permit pya lei te interview lah ko hae zah lah khia hae. Khualang na ki boi oh tou lah cih hae zah kae ki boi khyh lah ci hae. Te UN nynh mih sakhung tuh lah do sahae zah paw te bya khung naw lah nynh vae khyh hae.

Tuh e tu UN nynh pawtemou ou leih ci hae ci paw nyn lang ung khyh. Tuh thuakeiccu India te malay na um oh paw zotung ccawno hae khua lang na ki lang oh thua zemah ram 2 naw ung hae paw na uno zotung hae hanlang tua pya thya naw te sakhung tin paw hae kya myarya na raering ku thya naw lang kae ngia ry oh. Soso hanlang na ki zemah, pou ung lang te na ki zemah facebook kya sakhung tin paw kya na raering ku myarya aho cih.