News Home » World » Sungsah kunaw kya pyithyanaw/ muinsah hokhyh cite ccerarih lang lan saku nung Cambodian innbyn hae

Around the World

Sungsah kunaw kya pyithyanaw/ muinsah hokhyh cite ccerarih lang lan saku nung Cambodian innbyn hae

Zotung Minphuin 14 Oct 5

Atu lya myarya khesah nung Cambodian nung Kwan Dii te ah vawpaw hae sakhung kha muih lang um. Kwan Dii tuh myarya ah ngesaw rawpaw te myarya puithya nung thua keiccuze do ry mah kou um nung lukheit nynh thua, amaw tuh myarya puithya nung thua hin salazemah ah vawpaw hyn do lang thua zeh tuh ccangpaw muin san.

A vawpaw athua paw hynh a min ccaccing nyh thua khy salazemah facebook kya tuh Benly Joy cite nynh um. Joy tuh ange saw myarya mangpaw te atee ruih blyn myarya oh paw nynh thua, tuh apiazeh ah nadu blyn a muin myarya tha paw nynh thua. Joy tuh muin thya naw kya zeh phe ccing paw lukheit nynh thua.

Ccungccaw hae nynh a vawpaw muin sah do hae zah Kwan tuh a hooy leilang te pataepi ho hae, thuasalama zu athua nung Kwan nynh a vawpaw sungsah naw kha ccykhei sah mah ru lae ku khyh. Ccungccaw hae nynh paw paw te ho hae zemah paw lang ria pah khyh hae. Kwan hynh facebook kya a vawpaw te sakhung tin ku he hae paw kya ccungcca blyn a muin ee tha cite a sah rya hae thuasalama Kwan nynh facebook kya a vawpaw te sakhung tin ku lang paw hyn ah mae mazih maw thya khae ku khyh.

A vawpaw muinsan hyn dolang thua zeh lungthang te hung mya lang paw nynh thua thuasalama Kwan nynh a vawpaw Joy tuh thangccing te sungsah paw thua keiccuze a muin thya paw kya mah a lungthang khy. Kwan nynh sungsah kunaw hyn ho cih nynh lee zah, ho cih nynh a phu-ee cih paw kha ccerari lang a vawpaw kya te a lang sah. Kwan nynh a vawpaw a sungsah naw tuh myarya maw tyn. A vawpaw nynh ee tahaw paw zuh amawe ku paw hyn paw ci babang mou alung ry thua khae ku ngaw.

Nang na hinnaw kya ee paw tahaw paw na va tung lang thua zeh, na sungsah naw tyn kho cih tou? Sungsah kunaw tou na do ngaw thua khy zeh muin san tou na do ngaw? Kwan nynh a vawpaw kya a hoi paw sungsah kunaw hyn nang te kae zemah hoi a ho ccaccing paw nynh thua.

Credit Shwemom