News Home » World » Kalaymyo mah khyn vae khyh, Cciakhae tu hae nynh Raerin kunaw mihpi hae apya hae

Around the World

Kalaymyo mah khyn vae khyh, Cciakhae tu hae nynh Raerin kunaw mihpi hae apya hae

Zotung Minphuin 13 Oct 8

She hynh shethya athua vae cihaw te chin ccungccaaw patae khuasah bua naw Kalaymyo kya mah khynnaw ung vae khyh. Rilang ungpaw khawhpi ccakheih lang ata bua vae.Khuabawi hae nynh mihpi kalang thungpang thae sah paw alunghua tuh raerin kunaw kong lang mawcci vae. Abyapi langte nupi lukheih kyalya te khiaku khyhnaw lang te  zete sang phyphy moh kou te alia lang pou khyh naw lang hae raerin kunaw pya athua hae.

Alia vae paw kum patae kya cia Kalaymyo kya thungpang hoilei paw hynh thae lang myarya akhin. Thuasalamah 2018 kum kya e thungpang thah paw thae athua kou tetuh 2019 kum lungkhu blyn Kalaymyo khawhpi kya riling myarya ung vae.

Nupi hae kynde paw kong, Kumccin lohlei hae paw iikhae paw kong, ccungccaaw chia paw kong, ukccaw ruh paw hae kong, damiah hae kong ci tahaw paw thungpang thae paw myarya lung vae apiaze imua hae blyn ukccaw ru hae keiccu kyn athua vae hae. Miruh hae te damiah hae mihraw ryry hoy hae zah khuazi amoh naw kyat u ccungccaaw lukheih te cceih paw miakaw tuh hungry pya mang vae khyh hae.

Atu hawte Kalaymyo kya khynnaw ah ung vae khyh keiccuze Tahan e Methodist kriccaw buu kya e nungpibuu hae tuh khuazi pung ku ngan vae khyh hae zah nungbuu pungku ccyh tuh nithu lang pungku lang te anue hae cite thungpang thae lang ung. Atu hynh mihpi hae thawmaw te raerin kunaw pya hae zah accyh takyh hraw avia tu lang paw hae mah nung athua hae.

Mihpi raerin naw pya paw hae kyaze abyapi hua paw tuh nupi lukheih kyalya te khuazi lang apou khyh naw lang, alia lang apou vae haeze pynsaw kya nung thya paw sui miakaw lawku nang hae sah. Phua bawng hae blyn ccyn ku nang hae sah. Athua khoze tuh phone blyn ccynnaw paw bag hoi paw hoi hae sah. Mihmae nyn ku banglei paw ccungccaaw miakaw naeku nang hae sah. Bya hooy tem ah beih nag hae. Mih hyng eih lung vae hae.

Alia pou lang na cyi ze na innbyng hopya sya lang paw vava ning nang. Na innbyng lulhatkheih kya e phone number byheart te nyn kho naw zua ku. Pise na thua zemah khuazi amoh kou te asae khia ku mang nang.

Kalaymyo kya ahoilei paw sii ccahma hae te samaw rui paw hae eih lungtu vae hae. Samaw te sii hae re kunaw lang paw phua aho. Phua mue naw lang tuh Ccungccaaw hinnaw mah paw lang ria vae khyh hae. Tukeiccuze raerin kute tyty ung oh cite media te thungpang pya naw ccahnaw hae kya miakaw kya mangte Kalaymyo mihpi hae blyn hanlang taw athua hae cite thae lang ung.