News Home » World » A kum(30)cia vawpaw hoi khy keiccu a nung nynh a bua!

Around the World

A kum(30)cia vawpaw hoi khy keiccu a nung nynh a bua!

Zotung Minphuin 16 Nov 6

Taluh ram e nungpinung tuh accahnung a kum(30)cia vawpaw hoi lei,sakheipaw san a hoi khy keiccu Pali hae nynh phe kyn hae.Wang a ci hae paw nungpinung tuh a ccanung sihvaw haelua te a vae patae a bua keiccu a ccanung tuh a chiphang long kuzah vaemaw patae a mue.

Accahnung tuh a kum(30) a cih langcia vawpaw a hoi khy a piaze a ryalaw kya-e lakhah a muepaw zema mih luning te a zaw khy hae keiccu Wang tuh a lungvawsaw lungria thae te a ung.Tuhkeiccu a ccanung tuh a ryalaw kyate pou zah a nung sai a zuanaw kya ryalaw a bawm.

Pali hae nynh a honaw hae tetu arynlya balyn a nung nynh palei a lahbua vae paw nynh thua.A thangvae paw August saw balyn kha vaening pali hae kalang a ccanung nynh lah kaethe boivae paw nynh thua.Thuasalama vaemaw beihtaraw makhae a mue keiccu mih luning te se kae thusathung hae zah mih innlang kae ki sah hae.Atutuh pali hae nynh mih sai kalang he la thua hae tuh vaemaw patae pi lah mue,a kuihbaw,a phae te a ccu kya a chilua te vaemaw a mue cite thae lang ung.

Tuhkeiccu pali hae nynh mih nungccaaw te byakhia khylang cite pali hae ung nawlang ko hae zah Wang nynh phe a mya”ka ccanung nynh ka bua,ming hae ccaaw ka bua khy”cite phe a mya.A nung Wang tuh pali hae nynh kyn hae zah a ccanung nynh vaeram phua ccingzakhei oun pya zetuh ka ngaethya cih cite a ho.

Atakawlya Wang nynh phua rung lang phemah salama a puizia hae nynh a hopya naw lia hae te phuarung zah thonginn kyate phe pou vae.Thuasalama atutuh a nung nynh “inn ccyccae ry khy,bya zema khahkhi khakhah oun khung,ka thing eih ria vae zah bua nae khunglang thuaze kae bua cih ka ci pazah a maw nynh oun bua cite oun khung,te nynh kae balyn anghyninn e sihvaw haelua kalaw kuzah ka bua.Atolan pou pou vae”cite a ho.

Tuhkeiccu Wang hae zuvaw tuh mih ccapaw ngaehoi dolia kute dou kae sungsah hua keiccu innkhaan zema kae re pya keiccu a tuloukaw ka ccanung te bya palei kae lung cite zema Wang nynh a ho.

Credit-Alita Sui