•  
# A B C D E F G H I J K L M N O P Q R S T U V W X Y Z

Browse Definitions

Showing words by Zotung Minphuin (x)
  • Ramccangpaw bya, ccauh uhkheit min, ccauh kya balu kha zei vae ze, tukhyhze a min tuh um zah kha-e kha paw nynh thua cipaw langsah ry vae ze nynh aitalic hynh mang athua.
    Kae sazaepaw tuh Arabicbya a hothya.
    Nang so Greekbya na hothya tou?
    Atu Zo Maeccaw Mekazin a tho`ae hawte langmawlya Evo Mekazin te Zo Awnaw Mekazin mah tho boi la thua.
    Zion mua kalan a thua boi paw ah um oh zaw?
    Jerusalem khua kya Jesu phungho paw a thae`ae.
    Zo Eng Chanchin cikuh paw News kha Aizawl te a tho`ae.

    Ou hynhzeih ccawphianaw syntawnawpaw`ae a um paw hynh ah Zoccaw kya mah ccawzei vae ze mangbia lan paw phin nynh thua.
  • Ccaw bua khawpinaw kya abalyn te marya khawpi leite abang-asung te kyalya khawpi vae ze nynh ellipsi hynh mang athua.
    Azeikuhpaw: Pawccecize humzema Pachia’ Ccapaw a zyn paw tuh aro vae khyh ccaw, thuasalama zungzae hiinnaw a hoi ccaw cite Pachia nynh laephi ccungccaw`ae kha myarya a sungsah pawte a hoithy-paw a Ccapaw kha oun pya.
    Zyasahbung paw: …. humzema …. a zyn paw tuh aro vae khyh ccaw, thuasalama zungzae hiinnaw a hoi ccaw cite, Pachia nynh …. a hoithypaw a Ccapaw kha oun pya.
  • Khawpi a tua vae`ae paw kha bua khawpi tua ry ze bracket hynh mang athua. Kahnaan (ccinchia) kya patae a mang`ae. 2 [2 + (20+50)] - (12x12) = A
  • Koihkhawpaw tuh ccaw akonglang bua langsah a ry paw, tukhyhze alaku te hobua a ry paw, tukhyhze asuilan alokuhpaw kha a koihkhawpaw nynh thua.
    Akonglang langsah ry paw:
    Sulei phaza (Zekung khua um paw) tuh Vaeram kya a minthaan paw phaza ccangkheit nynh thua.
    Jesu Kri (Pachia’ Ccapaw) tuh laephi ccungccaw balyn Khumtu nynh thua.
    Kae kungku kya a um paw ccazing marya kae ky (kae web site kyakhe la dotua vae ii).


    Alaku te hobua a ry paw:
    Shakespear (a minthaan paw ccawzeitu) ccauh`ae tuh ria ry myarya um.
    Michael Jackson (a minthaan paw hlawsatu) tuh a taw leite nynh phe a chi.

    Asuilan alokuhpaw:
    Ccaw hynh hoyte tuasete zei aho, tukhyh lanze nyalang (malang) ah ccaw hynh yn kaethung kho lan khyh.
    Zoccaw byaccauh (Zoccaw disinnari) hoi kho nawlan zuaku aho.
  • Slash tuh puinaw ninsaw zei vae ze, sohlua sohku vae ze ninsaw zei vae ze, meeting kya-e minit zei vae ze mang paw phin nynh thua.

    Puinaw ninsaw (Pui nin): Kae tuh 1963 Febuari saw nin 24 nin nynh ka pui. (24/02/1963 tuh ka pui kum ninsaw).
    Ryalaw sohku nin: Nissan company kya 2012 kum Octoba saw nin 20 kya ryalaw na sohku ze ninsaw zeinaw kya hynhte zei athua; ninsaw: 20/10/2012.

    Meeting kya byapae paw minit: ZCC, 01/2000
    ZCC, 03/2001
    ZCC, 01/2013
  • Desh tuh vuaciah athang maw ccangpaw tuanaw, tukhyhze hopya paw, tukhyhze hory paw kha alaku kya saw bia khylan alangsah paw phianawpaw phin nynh thua. Desh tuh haifen ccanning se asae. Tukeiccu desh kha zei vae ze haifen kha vaening po zei lan paw nynh thua.
    Tousenaw lanze;
    Nang kae hopya paw – namaw nynh mah na ny paw – ka bya kha pawlangrialeite-um nan vae la ii.
    Hynh-e inn – te laanpi zung e inn miakaw – tuh ro athua cih.

    Kae khua kya – nanning nae khua kya mah – ccungccahoylei`ae um khyh.

    Vaawran thuanaw lan paw ccianawlaanpi ccangkheit rou nynh um – Jesu Kri te ccia lanze rou.

    Kae umnaw Nashville tuh – nanning na umnaw oh Atlanta mah – kumvaelori kou ahoy.
  • Haifen hynh byaccan ccangning, tuhlaelungpaw byaccan kha ccangkheit lante mangnaw kya, namba popianaw kya te byaccan riathya nawlan phianaw kya phin nynh amangku.

    Byaccan ccanning ccangkheit lante mangnaw kya:
    Pumhaw-pumkheit tuh pya lan accanpaw nynh thua.
    Sungtaruh-ccangpangaw nae thuakhae cih ii.
    Pumthung-pumning kha namaw elan nungkuh lah pumthung-pumkheit kha nae thuakhae cih.
    Namba popianaw kya:
    Ccanaw namba 11-23 cia ria vae la ii.
    1982-1986 kum cia University ka kae.
    Imua`ae kum 1- 4 cia sikaw lan accan.
    Suimilan 8:00-12:00 cia ccangkunaw um cih.
    Byaccan hmerarihlan riathya nawlan phiapaw:
    Amia satho eih lung paw tuh a-ue-a-ae-um.
    Abang-asung te nynh atu tuh ah ny ung oh.
    Arah-akhuipaw roi nae thae cih oh.
    A-ngae-aduakuhleilante byaho nan oh.
    Ano-ungpaw numae tuh vawpaw bua hoi a ry.
    Athah-aruhpaw lan tang ry nan hei oh.
    A zyn`ae paw nynh baptisma-in`ae.
    Bya-eikupaw tuh hoy khyh.
    A ae koute a sa-y paw kha ka thae.
    Ccae-iccaethua-um lanpaw thuakhyh.
    Chia-nin-lo-nin kya pekumaeku apui he.
    Hynh-e tuh minmin kya-e nynh thua.
    Hae-ungnaw kya kae la ngaw cih oh.
    Tuinkya hae-ung lan oh.
    Kha-e kha oun ccyngbia oh.
    Khua-o lan po a cceih vae.
    Kyhrarihlan-um lanpaw nynh thua.
    A kya-e kha lawpah nan vae lou.
    Looh-aesung lan accan.
    Luathua-ae-uilan-umpaw yn langkuh cih.
    Ngaethya-umsanaw hoi khyh`ae.
    Nguelih-nguelae paw kha oun ccyng nan oh.
    Pumkunaw kya nua-inua-ae-um lan paw thuakhyh.
    Ccaawpui lan cih zah neita-ngia accih.
    A hopaw pawlang-umleipaw nynh thua.
    Bawipaw bya kha pawlangrialeite-um nan.
    Awnaw tuh phaephae-ahpaw nynh thua.
    Na nung kha reih-ireih-aenung nan!
    Po-uccaw tuh kou a puithya.
    Thing-aw te thing kha aw.
    Thingthae-eccang kha oihsah oh.
    Tei-e hynh mou na ho paw tuh?
    Tuh-e tuh ahoy cite na tua tou?
    Jew pise`ae tuh vindung-awkuh`ae.
    Zu-aeteciaku lanpaw thuakhyh.
    Zu-aehoysanaw tuh sung lanpaw nynh thua.
    Bawipaw tuh zynlan-umpaw nynh thua.
    Zynlan-umpaw see hoypaw thua oh.


    Byaccan athang maw phianaw kya:
    Ccungccaw miakaw nynh hynh-e lungngaengan-khaekunaw hynh hoi kho khyh`ae.
    Innbyng kya imua`ae kyate a pou paw ccae-iccaethua-umpaw tuh rylan-umpaw thuakhyh.
    Aening oun khumtu te oun sawkhawtu Pachia’ sung-sanaw tuh kou ale raria!
    Rom rhawbawi`ae te Paul tuh Rom ramccungccaw-thuanaw kya lokuh khyh`ae.
  • Apostrofi tuh ahoitupaw alangsah paw, hum te nynh aseku cipaw alangsah paw te ccaw dynsanaw kya mang paw phin nynh thua. Tuhzema aening Zoccaw kya tuh ahoitupaw langsanaw kya eih ah mang loh khyh oh. Mang lanze athuathya. Mang lan accan vae.
    Ahoitupaw langsanaw kya:
    Imua`ae’ ccukoh. (Imua`ae kya-e ccukoh).
    Ranpi`ae’ lukhung. (Rangpi`ae kya-e lukhung).
    Ma Ma’ angki. (Ma Ma kya-e angki).
    Thungsoipaw’ phua. (Thungsoipaw kya-e phua).
    Mia Mia’ uccaw. (Mia Mia te asekuh paw uccaw).

    Ccaw dynsanaw kya:
    Vawlae e pavaw`ae hawt’ (... pavaw`ae hawte).
    Pavaw hawt’ ka zou thya ze, (pavaw hawte ka zou thya ze).
    Ka ryachi salam’ nang na elan ka hysah cih.
    (Ka ryachi salama nang na elan ka hysah cih).
    Laanme ngawraw hawt’ ka khiakuh cih.
    (Laanme ngawraw hwte ka khiakuh cih).
    Ka sungsanung tuh amang, t’zema a lunghaw.
    (Ka sungsanung tuh amang, tuzema a lunghaw).
    Lonaw’ ryalaw (Lonaw nawkheit ryalaw).
    Nin’ rya (Ninkheit ryalaw).

    Abapilante hlawphua kya te ccawphua (kabia) kya nynh ccaw dynsanaw hynh amangku.

    Hlawphua kya:
    Pou Bawipaw oun pae lah vahu hawt’ zoute, Na kya ka umbua cih lungtuabya hote,

    Zion maepaw tui ngasaw hawt’ ka pae cih,
    Laevaw ngaethyanaw balyn suilukhung te ruku lan.
  • Khawpipaw syntawnawpaw tuh dairect khawpipaw, tuh-e tuh phe a ho vae`ae paw, phe a zei vae`ae paw kha kha-e thathyhte bua zei thui paw akhung paw nynh thua.
    Jesu nynh, “Kae tuh ccianaw, byaccing te hiinnaw nynh ka thua,” a ci.
    “Rang lah e hynh yn khuin,” a paaw nynh a ci.
    A ho paw tuh, “Cceih lah ae.”
    “Bu phe ka thaw vae!”
    Buahothuinaw kya tuh khawpipaw syntawnawpaw ho vae khyh:
    Rang lah e hynh yn khuin cite a paaw nynh a ci.
    Cceih lah ae cite aning nynh a ho.
    Bu phe ka thaw vae a ci.

    Khawpipaw ccangning te khawpipaw ccangkheit mangnaw (“...”) (‘...’)
    A ho tou vae paw bya kha bua hothuinaw kya ccaw te zei vae ze khawpipaw kya mang paw phin.

    Tousenaw lanze;
    Aning (mitmohpaw) nynh khung`ae zah, “Jesu acikuh paw ccungccapaw nynh ccingccua rae zah ka mit kya yn thuhpya, te, ‘Siloam kuaa kalan la cceih lah la singkuh,’ yn cipya; te ka cceih zah ka singkuh, te ngaw ka muih,” a ci. (Johan 9:11) Ekya “ ………” te langsah paw hynh mitmohpaw nynh a ho paw khawpi paw thua zah, ‘ ………’ te langsah paw hynh Jesu nynh mitmohpaw a hopya paw kha mitmohpaw nynh bua a hothuinaw kya khe mang paw nynh thua.

    Jesu nynh, “Nanning tuh nae mit a la moh lanze, seinaw na hoi cih lei oh paw, thuasalama atu nanning nynh, ‘Ngaw kae muih,’ na ci oh; tukeiccu nae seinaw tuh phang a um,” a ci. Ekya “……..” cia hynh Jesu nynh a ho paw thua zah, ‘………’ kya kha Jew`ae nynh a ho`ae paw kha Jesu nynh bua a langsakunaw kya zei paw nynh thua.
  • Semikolon tuh ccaw azyahuapaw phianaw kya, amawte asuilan pheccin paw byaccanphu phianaw kya mang paw phin nynh thua.
    Azyahuapaw ccaw kya:
    Aning tuh voh, ui te mia a hoi; kha-e`ae kha khokhu lungkhu nynh a nung`ae.
    Inn kya ka paw, ka nung te ka ccianung a um`ae; te minmin tuh ccyasakuh`ae zah a nuin`ae.

    Amawte asuilan pheccing paw byaccanphu kya:
    Kha-e inn tuh khamawte khaw a um vae; hung nynh san re talih vae lan khyh. Khuarah zah tui pung ale; vakang e thingku abang te laeming phe ting vae.

    Aphin`ae phu kya:
    Tuisaw phin kyaze vawkhu e nga-awpaw, ngalyng, saepang; pavaw`ae vapasy, kebia, khoiparyng; rangsaw ze sakhi, sazuh, sazaw`ae tuh ae lan kou athua.