101 Uteno hae, Israel hae hanlan ka thinlung kya ka rynaw te Pachia kalan ka sawsangnaw tuh minmin nynh khumnaw a ccou nawlan hae nynh thua.
2 Minmin tuh Pachia hanlan lungthawsaenaw a hoi hae cite ccaekia ka khan kho; thuasalama tuh-e lungthawsaenaw tuh ahmepaw nythyanaw thyhte thua khyh.
3 Pawccecize minmin tuh Pachia kyate yn thuapaw dingnaw kha ny leite, mimaw dingnaw kha tynsah khylan a zuaku hae keiccuze Pachia dingnaw kalan mimaw te mimaw kha pyakuh vae khyh hae.
4 Pawccecize a zynpaw ccungccaw miakaw hanlan Khri tuh dingnaw mue nawlan kawbya accingnaw nynh thua.
Ccungccaw balyn elang Khumnaw
5 Moses nynh Kawbya te asekuhpaw dingnaw kong kha zei zah, “Hynh-e hae a zuipaw ccungccaw tuh hynh-e hae liate a hiin cih,” a ci.
6 Thuasalama zynnaw te asekuhpaw dingnaw kong tuh hynhte nynh a ho: “ ‘Hummou vaawlang a kae cih?’ cite na thinlung kya ho nan,” (tuh-e tuh Khri kha vaawlang te sawbung lan, cinawpaw nynh thua)
7 “tuhkhyhze, ‘Hummou akhunaw lang a rungbung cih?’ cite mah na thinlung kya ho nan,” (tuh-e tuh Khri kha chinaw kyate thoosah lan, cinawpaw nynh thua) a ci.
8 Thuasalama pawmou bua a ho?
“Bya tuh nanning te anaekuh,
nae mung kya te
nae thinlung kya nynh a um,”
a ci. Tuh-e tuh kaening nynh kae hopaw zynnaw bya hynh nynh thua.
9 Pawccecize Jesu tuh Bawipaw nynh thua cite na mung te ccaekia na khan zah Pachia nynh amaw kha chinaw kyate a thoosah cite na thinlung kya na zyn ze, khum na thua cih.
10 Pawccecize ccungccaw nynh a thinlung te a zyn liate thyaaccousah thua zah, a mung te ccaekia a khan liate khum athua.
11 Ccathyaa nynh, “Amaw a zynpaw tuh maethyanaw ccou lan khyh,” a ci.
12 Pawccecize Judah minphuin te Grik minphuin laku laesahnaw um vae khyh, Bawipaw tuh ccungccaw balyn Bawipaw thua zah, amaw a kopaw balyn kha hythuanaw patae a pya hae.
13 Pawccecize Ccathyaa nynh, “Bawipaw min a kopaw miakaw tuh khum athua cih,” a ci.
14 Thuasalama minmin nynh a zyn khyh hae ze pawtemou a ko kho cih hae? A thae khyh hae ze pawtemou a zyn kho cih hae? Phunghotu a um khyh ze pawtemou a thae kho cih hae?
15 Minmin kha a saw khyh hae ze pawtemou phung a ho cih hae? Ccathyaa kyaze, “Thehoypaw a hotu hae ccu tuh pawcih baban apuithya!” cite azeikuh.
16 Thuasalama ccungccaw hae balyn nynh thehoypaw kha zui khyh hae; pawccecize Isaiah nynh, “Bawipaw, kae hopaw bya kha hum nynh mou a zyn?” cite a ho.
17 Tukeiccuze zynnaw tuh thaenaw kyate nynh yn thua, thaenaw tuh Khri kong honaw kyate nynh yn thua.
18 Thuasalama bya ka khia rypaw tuh, minmin nynh la thae loh khyh hae tou? Phe a thae ccaccing vae hae; pawccecize,
“Mih roi tuh laephi pynpi kya
po zeihkuh vae zah,
mih bya tuh laephi athangnaw cia
phe a thua,” a ci.
19 Thuasalama bua ka khia rypaw tuh, Israel hae nynh nyh khyh hae tou? Masaty lan Moses nynh,
“Minphuin athua lei hae paw khate
eiungnaw kae hoisah cih oh zah,
angaeepaw minphuin khate
nae thin kae riasah cih oh,”
cite a la ho.
20 Isaiah nynh myarya rawhoyte ho zah,
“Kae yn ccung lei hae paw nynh
phe yn muih vae hae;
ka konglang yn khia lei hae paw kya
phe ka langpakuh vae hae,” a ci.
21 Thuasalama Israel hae konglang Isaiah nynh ho zah, “Kawngae leipaw te eitalaepaw minphuin kalan khe anin ninlang ka kuih ka dyngpya,” a ci.
