Phezua Bawi thuapaw Paaw Mang Sui tuh Zotung rang ka haaw cih cite cceih zah, Zotung rang lan e Innmae bawi ccanung kyakhe ccaaw kha saah zah, a ccapaw ming tuh Pw Lai Bawi cite a phu. Tuh-e Pw Mang Sui nynh Zotung rang a la kae lya hyn kum (1730) loukaw nynh a thua cih. Kum (1750) loukaw hynh Pw Mang Sui tuh Phezua khua kya khua kha sak zah, Zotung rang e a ccaw thuapaw Pw Lai Bawi tuh a paaw khua saakpaw sawdoi khylan kha a paaw nynh a sawbua. A ccapaw Pw Lai Bawi tuh a paaw (Pw Mang Sui) a khua saakpaw saw tuh a doi vae. Pw Mang Sui tuh a zupi kyakhe ccapaw a hoi khyh keiccuze a paaw (Pw Mang Sui) nynh khua saaknaw kyaze a paaw (Pw Mang Sui) nynh a chia, a loonaw te a cyisanaw kha a kyng sah. A suilang tuh Pw Lai Bawi tuh innhy lang a saakpaw nynh a thua.

Thuasalama pise ccaw kha ccangpaw a hoi khyh keIccuze rho-ccoutu ccapaw lang kha a tang sah. Te, khua saak tuh thang zah Pw Mang Sui nynh a ccapaw (Pw Lai Bawi) tuh: the, li, phua, ccezung, Sivaw tamuing te pynccei ruipi ryte rho lang a pya aè paw kha Pw Lai Bawi a ccaaw aè nynh pathyh-pahaw te a ccou aè paw kha kum (1966) kyate atu kyacia Pu Ni Lian a bawi lya zema ccungccaw zapi muinaw kyakhe thua aè zah, a muih sah aè. Tuh-e tuh Pw Mang Sui a ccaaw thua keiccuze sawtua aè zah, Zotung balyn kha a tae aè.

Tuh-e kyate a ccawno sinpaw kyacia uk aè zah Miraw yn kae lya cia bawi lang a tang aè. Pw Lai Bawi nynh ccapaw Pw Bawi Ceu kha saah. Pw Bawi Ceu tuh Ccungsung khua kya bawi lang a tang. Pw Bawi Ceu nynh ccapaw Pw Tin Hrang kha saah. Pw Tin Hrang nynh ccapaw Pw Van Thang te Rung Ceu kha a saah aè. Pw Van Thang nynh ccapaw He Lung, Ni Mang, Khup Piang te Han Thaw kha a saah aè. Pw Van Thang a ci aè paw hynh ccungccah hoy leipaw la thua zah, a chii dynze rho a ccousya aè paw tuh; humhung nynh zema ka ming Van Thang cipaw min hynh la phuku nan aè sah a ci. Tukeiccuze a ccawno she kya zema tuh-e min tuh phuku cipaw um vae khyh keiccuze ccawno she kya zemah ming tuh a zo vae zah, bawi a thuanaw te a leesaenaw mah um vae khyh.

Tukeiccuze Zotung bawi thuanawpaw tuh Pw Van Thang ccawno aè nynh kyng vae leite Pw Rung Ceu a ci aè paw ccaawno aè nynh a kyngnaw vae aè. Pw Rung Ceu nynh Min Thang, Bawi Tu, Thang Ceu te ccanung-ccapaw ccangpaw kha a saah aè. Pw Thang Ceu ciku paw tuh Laepi bawi lang a tang. Thang Ceu nynh Dai Khup ciku paw kha saah zah, Dai Khup nynh Lian Tua a saah. Lian Tua nynh Tum Sung, Ro Hei, Ni Lian te Van Bawi a saah aè. Ni Lian nynh Mang Lian te Tin Mang kha a saah aè. Ccungsung bawi Chia Ling tuh lesae zah, Miraw she e rang bawi cipaw phe thang cia Pw Van bawi a ciku paw a bawi cciamang lya thua zah, see milu 50 a hoi aè. Chiling bawi nynh: Ccunsung, Sesii, Seccae, Lotaw, Rezua, Ccawtui, Rangsae, Tuibyng, Etang, Thangdia te Hunglae cia khua kha la zua aè zah, tuh-e khua a zua aè paw khua takyh kyakhe bawi lang zema a tang aè. Mara te Lautu tuh Thawtang pe langte oun thua aè paw thua zah, bawi lang a tang aè paw tuh Ngalang phin nynh a thua aè.

E Zotung rang e Chiling bawi (Thialing bawi) phin konglang kae zeipaw hyn a sei lanze Chiling bawi a thuapaw nynh mah thuasah, Thialing bawi a thua leipaw nynh zema thuasah na la ngaeccan khyh nawlan oh sawtuanaw te ka ho ry. Pawccecize kae nynh ka thya, ka haw zah ka nypaw bya thualeite ccaw kya e ka riapaw te ka muihpaw kha Chiling bawi thua zah nung te paaw nynh cciataw (chihtaw) aè zah phute lang a nyng vae leipaw nynh a nyng thui nawlan thuasah, nung te paaw nynh phute lan kiakia a nyng vae leipaw nyn zemah a thaw lante buabua nyngthui nawlan thuasah, tuh-e aè elan te Zotung uno a thuapaw aè nynh zemah thuasah, Zotung phungpaw nyng nawlan cite ccaw ka riapaw kya-e kha kae zanbua (neethung) oh paw nynh a thua ii.

Credit : Pw Ko Ting