Global Zotung Conference (GZC) kyate USA lang khua ccungnaw kyaze vae (1) naw Global Zotung conference nynh thadyngpaw Zotung development Foundation (ZDF) nynh rya lawlang cite paccyngpaw department (11) konglang hynh thuanaw khua takyh kya hopya athua.

ZDF department (11) lungkhuze paw hynh mou Zotung minphuin te Zotung ram kaethungnaw lang bapihua thuaza paw rya mou law tylang cipaw hynh ccungccaw pataepi nynh nynhkho khyhaeza nyng ary hae.

Kaethungnaw cipaw bya ccangkheit te zaw khyh. Pawpaw sang mah kaethungnaw umba leipaw vae accozah uhkunaw lungkhu umbua paw Zotung ram mah tyngrei kya miakaw kyate kaethung nawlang lawlangpaw rya mawcci cite hokho athua.

Laephi vawlang e a kaethungpaw ram hae nih mangpaw ccungccaw kaethungnaw cipaw tuh, pyngsaw ngedanaw, ccungccaw ryakunaw, thyahaw ccangkunaw, pyngsaw thinglung khyngnaw lang upadi te khungkunaw, athyapaw te acciccae kuhpaw inn lo te peipang tyngre thyapapeh thuanaw, ccungccaw balyng vui kuakunaw ryahae tyngpaw hoite ryaku khonaw, umnaw ram lungkhu kya rythyh te ccialeiku khonaw langpi te ccialeikunaw langpaw motor te ccaccangpaw mualawng, vawzy inn citahaw uhccaw tyngre mangkhonaw, ccungccaw hanlang ninthu khuazi ahopaw mae (electric) te thyazah accicca kuhpaw tui mangkhonaw, ccungccaw te ccungccaw laesakunaw um leinaw lang accingpaw human rights, citahaw miakaw tuh kaethungnaw cite muih athua.

A vawlang e kaethungnaw tyngre tuh Zotung minphuin te Zotung ram kya ccangkheit sang um leipaw athua. Athua langze Zotung minphuin te Zotung ram kya a um leipaw kaethungnaw tuh pawkyate mou atho cih oh. Paw hynh mou minphuin hanlang bapibua athua cih?

Masaty lang tuh e kaethungnaw rya ounlaw palangpaw ryalatu ccungccaw (human resource) hoity aho.

Singapore nynh Malaysia ram kyate luenaw (independence) a lawlyaze masaty ryalawty paw tuh ryalatu ccungccaw (human resource) hoikhonaw lang ccangkunaw (education) hynh kum 10 simanking te Singapore ram kaethungnaw ryalaw hynh atho tyhae.

Mihram lungkhu e ramccang sia-inn kaelang qualify athuapaw miakaw ramccang (USA, UK) lang sia-inn kaelang sawhaeza, ramccang sia-inn kaelang qualify athua leipaw ccungccaw balyng hanlang ramccang e ccangpatu ccungccaw konuaza accang sahpya hae. Mihram kya mangpaw Malay bya khah mihraw (English) te ram bya lang aru lae.

Kum (10) lang aro kyte ramccang te ram lungkhu e sia-inn kaepaw mih ccungccaw (human resource) hae khah, ram kaethungnaw lang rya pyate rya haesah athua. Tuin human resource kyate ountho typaw hae Singapore ram tuh Asia kyase thualei te laephi vawlang a kaethung cceipaw ram hae cite muihpaw USA, Europe te Japan ram haery nganku te a kaethung vaepaw hynh ccungccaw blyng nynh muihkho athua vae.

Athua keiccuze Zotung minphuin te Zotung ram kaethungnaw langtuh Zotung Development Foundation nynh paw rya mou lawty lang cite khiaku langze minphuin te ram kaethungnaw rya lahlangpaw ccungccaw (human resource) hoikhonaw lang thyahaw (education) ccangkunaw rya lawty lang cite GZC nynh phi athua cih.

Pawtemou ryalaw tholang
Ram takyh umpaw Zotung minphuin blyng nih umnaw ram kya mangpaw phua (100) cci te khoi kulang. Vaeram umpaw Zotung ccungccaw zaera nih (Ks 1000) cci te khoi langza, accozah, company kya ryalatu blyng nynh ninkheit thawsya (ks 3600) cci, hoirung kaethungnaw ryalatu hae nih (Ks 100000 te thahlang), ramccang umpaw Zotung Communities te organization hae nih ($ 500 – $ 1000) cci, ram lungkhu te ramccang umpaw Zotung kriccaw buu takyh nynh mihmaw kriccaw buu hysanaw thahthyh te khoi langza 2016 kum kya $ 120000 ccingsah lang

Zotung sia-inn sah lang
2016 kum May saw te 2017 May saw lungkhu, Sia-ihmua 300 te 400 cia accung langpaw sia-inn ccangkheit hynh Keko khua sah lang. Zotung sia- ihmua tang 5 te 10 cia, sia-inn kya um, sia-inn kya ccaw ccangku (boarding school) te ccaw ccangpya athua cih.

Pawkeiccu mou Zotung sia-inn tuh Keko khua tuh nong lang

1. 24 hour mae athua
2. Zotung ram pawpaw khua kyate cciazemah ninkheit te ccialeikho athua
3. Vaeram Kalay, Mandalay, Monywa, Pakokko te Zekong cia ninkheit te ccialeikho athua.
4. Tui langpi (leihsaw), mualawng (rail way) te motor langpi pong ccing te ccialeiku kho athua.
5. Sia-ihmua 300 te 400 nynh nintakyh aenia langpaw enaw rahnaw te saw aphingphing rythyh te reikho athua. Ccahta (rice) te ccaccangpaw aepaw niapaw me kou azui
6. Sia-ihmua te ryalatu hae hanlang ngedanaw langte do oihkunaw Sizung, Sibawi te Sikhan (clinic) patae um
7. Keko khua kya Zotung minphuin inndung 500 lae te mihlu 3000+ um haeza Zotung ram Razua myo kou te Zotung minphuin alunghua umnaw khua athua.
8. Telephone (landline), mobile phone, computer te internet rythyh te mangkho athua keiccuze, ramccang umpaw Zotung minphuin haery zoibaheh lang behku khonaw te thaeku khonaw kou hoi.

ZotungDF