-
1.1K Views 0 Comments 0 Likes 0 Reviews
Nung nynh ccaw kha satakua apoi. Anin saw oun kyhte neitangia avue oun ccih. Tuin te nopi nung anung te apui haepaw kha ko hae zah phang a umkhae hae. Si sayama cipaw um louh khyh. Nopinung avue kha thaw te oun ccih za neitaw puilang oun cih tuh san oun pya vae. Neitaw kha oun pui vae tetuh alaerui kha dandae (rua) te ah aw hae. (Dandae cipaw tuh rotahkha ahe langte asui pya haepaw kha nynh ahory). Boei thyapapingpaw te lung hae za zya it sahae.
No aw;- Aawpi zema awkhum zema no aw lang nynh awpi kae chia, ange dansah cite sawsang hae za aw kha achia hae. Nopi ze ninthum pise ze nin pali bia mawlae zung innthung nynh phang khumku hae. Te nopi ze ning(6) pise ze ning(10) cite vahung taraw kya khe,
Nodue lang ccung taraw kha adua hae. Tu e no due adua nin hae khe neitaw min kha a sui alam um lang te aphu hae. (no khu uin a ci hae.)
Due dua lya haekhe; Zekaw e sungrung tum(mikhia tum) aci haepaw kya khe aw uirung phu kha mikhia lang bua achia hae. Mungpi thung awkhungpaw inn malang sakoih zung khe bua achia hae. Imua takyh oun le te awlaw te sisia avua pya hae. Takyh bua oun le te awkhumpaw te maekhuh pyahae. Ccangvae oun thua te awkhumpaw te neitepaw aki zungthum loukaw te vawdou pya hae. E koute tuh zu ahoi pya vae hae.
Awe;- Cipaw phung aum. Due adua pyamaw haetuh apaw kha ryalaw phe sung. Maethe saw leilang. Tui ke leilang. Pawcce cize imua muisaw kha maethae kya phesaw bia, tui nynh amuisaw kha phe lou cih za achih sei cih cite azyn hae. Sawpaw adia maw balyn tuh raeringku te nynh a um hae. Ccang lang rya alawnaw hae kya nynh kae awe aci hae ze, tuihung taraw kya khe ccanphaw kha the hae za, na muisaw nynh kae ko cite ccangphaw kha mih kuitphe te hei haeza Ryyr cite ko hae za inn valang khe imua umnaw kya cia ako hae. Ah vaeccaw hae nynh athua vae, athua vae aci pya hae.
Ccalah;- Ccalah tuh innphuloih lang khe nynh apui sah hae.
Nizua ccaw;- Nizua ccaw tuh patung inn kya athua ze atolang nynh apui sah hae.
Mihmaw ccaw;- Innthung innlylang tangkhan cculia kya apui sah hae.
