1933 Kum Razua siainn kaenaw kyate Pachia thehooypaw bya hynh siaimua hae nih va thae vah zyn hae salama, hoi te a tyngpaw kriccaw la vah thuakho lakhy hae. Hasaw Laenui lungkhu phung/kriccaw laa vah ungtou paw hae tuh:
(1) Bogyi No Ting (Ccungsung)
(2) Paaw Maung Khum (Langly)
(3) Paaw Lian Uk (Ccungsung)
(4) Paaw Ccung Po (Ccungsung)
(5) Paaw Lei Khui (Ccungsung)
(6) Paaw Nin Zah (Ccungsung)
(7) Paaw Ra Hu (Ccungsung) hae nih a thua hae.
Atyngpaw Pachia thehooypaw bya thaebua khonaw, zynnaw ccahccin a va ung takawnaw tuh akawlaa haw te nih a thua.
1945 kum kya Singer-salai Mang Hung a paw U Lian Uk nih Ccungsung khua kya kriccaw buu cite vah cciakhae tou hae. Thuasalama, Setaa ryahaenaw a thaw eh a sae kiaccuze, kriccaw buu laa vah taakho khy hae. Hynh-e tuh Pachia phung nyng te Hasaw Laenui khua kya thehooypaw bya a thotounaw te a umtounaw kum nih a thua.
Tukiaccuze, 1945 kum tuh kriccawbuu ungtou naw a thua kiaccu, 1995 kum tuh Ccungsung khua Baptist kriccaw a umnaw. te kum (50) Sui Jubilee kum cite kae rianawpaw a thua. 195 kum, Ccungsung khua Baptist kriccaw a um takaw lya tuh Ccungsung khua thuasa, Zotung pyngpi kya thuasa, buu ccapaw va ung lakhyh.
Khohcca laa siainn a kaepaw hae Paaw Mang Lian, Paaw Va Sa, Bogyi Mang Tu hae nih Hasaw Laenui Ccungsung khua tuh Kriccaw khua laa a takhonaw la, lung vawsaw te 1952 kum kya Lungngo E.C meeting kya. tazaehaw sazae a va sawh hae. 1952 kum April nin (6) nin te Sazae Lo Kung tuh Ccungsung khua thua zah, kriccaw innbyn a um lakhy kiaccuze. Paaw Va Sa inn kya nih a um.
A kum a ccia dyhkyh hawte. Ccungsung khuabawi paw Paaw Daw Kung, Paaw Raw Uk, Paaw Le Va hae innbyng cite. inndong ze mah dyadya ae lungthung vae. Aromaw ze lawki laa taa haepaw nungpaw hae laku kyate Paaw Khe Bik, Paaw Za Kua citahaw te liaccaw ccavae hae mah kriccaw laa a ungbua vae hae. Tuh lya kriccaw picca laa a taapaw tuh Paaw Raw Uk Vung Tuh vaw nih a thua. 1952- 1955 lya tuh kriccaw buu a thaw kou a sae vae.
Tuh ccyh lya, tounaw a ccahpaw ccakheih tuh, kriccaw piccapaw te kriccawbuu a baa thaesei kunaw a ung kiaccuze, kriccawbuu cca (2) laa aphiakuh. Sazae Lo Kung tu a kum a notuu ung kiaccuze, resuinnaw/hopianaw nyh thyavae khyh zah kriccawbuu tuh cca (2) laa pheih phiakuh haa vae.
Tukou te Rev. Ku King te Rev. Sa Ting hae nih Ccungsung laa tuh ccianua hae zah Paaw Le Va tuh kriccaw picca laa a popya chui hae. Tulya ze kriccawbuu inndong 29 cizah, mihluu 182 a ci.
1955 kum lya Roman Catholic Father Barack (France paw) tuh Ccungsung laa yn thua zah Paaw Daw Kung te a baa hae inn (17) tuh Roman Catholic Mission (RCM) laa a tei hae. Tuh lya tuh Paaw Raw Uk tuh teibua lakhy: Sazae Lo Kung zema. Ccungsung khua um vae khyh.
Tuhawte muisaw vuelaw-cuihaw te kae ung lya ze, kae nin Ccungsung hae hala. Pachia nih khua yn khapya paw tuh Sazae Ca Thang thua zah 1960 kum July nin (5) kya Ccungsung khua yn thua zah muisaw loh te cui yn daa.
A thua zete kya Sazae Ca Thang nih Paaw Raw Uk inn kya tee zah hoi te a hopya. Paaw Raw Uk nih, Sazae Thang Thang, nae thuapaw hynh sung kheih nae sung khyh, raa kheih nae raasah khyh, atu lonaw kya siabawipaw pheih kae kovae, ci te a leh. Tukou te Sazae Ca Thang tuh ngaethya te Paaw Le Va inn laa nih bua a ccia vae.
Paaw Raw Uk tu July 08, 1960 kum nin te RCM buu laa a tei vae.
Tuh lyaze Baptist buu laa a taapaw tuh inn (11) makhae thua zah, hoy te kriccaw laa a unghae paw tuh inn (4) lokhaw nih a cih.
Sazae Ca Thang te Pachia rya a lahkheih haepaw tuh, Paaw Le Va (Kriccaw picca) Paaw No Mang, Paaw Sua No te Sazae Cung Khu hae nih a thua hae. Tuh ccyh lya tuh, khohrum-raarum beihnaw Setaa lesaenaw kou lung zah, voklaw chia, bawi te a ungkya hae thuasalama. Sazae Ca Thang tuh kriccaw Tazaehaw Sazae a thuapi te poi takyh kya thuabua zah, mino hae kya dahungbua te Pachia hlaw ccapya te a cciakhae hae.
