Update your settings

Zotung minphuin paaw (father of Zotung) thuapaw Paw Khua Ming tuh Zotung minphuin hanlan pynsaw lante thuasah, muisaw lante thuasah minphuin hanlan a ryalawnaw kou lung keiccuze Zotung minphuin nynh Siabawi, doctor, rhoccaw, te ccaccangpaw lasung patae a pya ae'.
Paw Khua Ming tuh laephi hiinnaw phe thang vae salamah, ramccang e kriccawbuu ae' nynh amaw liathui nawlan cite a chinaw sawpaw April naw kheitnaw kya hynh kriccawbuu abang nynh Khua Ming Sunday lang cite a mangpya kho vae ae'. Khua Ming Sunday kya thuapaw lungsing hynh Zekung lang a ky ae'. E lungsing hynh Khua Ming Scholarship a mue ae' paw thyahawnaw lante a kae ae' paw siaimua ae' bawm nawlan a mang ae'. Kum kheit vae kheit April naw kheitnaw kya tyty a mangpah kho ae' paw buu a um vae.
Paw Khua Ming tungvaw lungtua ae' paw nynh hlaw te bya thehooy pya ae' tuh akawlang hawte nynh thua.
Hlaw Yn Phua Ae' Paw te Kamaw Hlaw
♪ ♪ ♪ ♪ ♪ ♪ ♪ ♪ ♪ ♪ ♪ ♪ ♪ ♪
(A) Sung-uu Hlaw
(1) Khyzaw bawi te ae pokuh ae' paw, la zou ccavae lah zunginn kae lan Pum Pum paaw ou..... (Lang Uk nung hlaw).
(2) Vae ram lezinpian te vawlae ka zou vae, ka nge lungry khaw-e Pum Pum nung, ngedan te na um oh ta?...... (Kamaw hlaw).
(3) Vae ram bawi zung hanghuanaw kya na um vae, Luithang Vazu humhum raw mah mah la rih nan vae lah ii..... (Pum Pum nung).
(4) Dikari (degree) tuh ka law bua zema ou...... ka paaw Vazu apaan namaw tuh kae phah kho boi cih zawtou..... (Khan Ling hlaw).
(5) Khua Ming yn thua ngaw cite oun ho hae zah, Aikaw khopi te kae la umduepaw lahyn ou..... (Daw Tin nung hlaw).
(6) Ccia lanpaw than palei ho nan oh lou..... Palimepaw thingccang mualia a khung cihpaw nynh hei la um ung ou...... (Daw Tin nung hlaw).
(7) Tingpawlaenoi nung khua e liaccaw ae' ou..... sua-mungkae te Lungngo laanphae lang cciadue oh, Pum Pum paaw yn thua vae....... (Lotaw Sui Sui hlaw).
(8) Ccungsung khua tuh na thua boi paw zawta, Pum Pum paaw ou...... liaccaw phae vawlan it lou...... (Ccungsung Ma Yng hlaw).
(9) Ccungsung khua tuh ka thua boi paw tou..... thua ou..... Hangsaw liaccaw khaw-e puithya nung tuh Khua Ming ka zung lang rang sah ou...... (Ka liarupaw hlaw).
*** Malanglya tuh bawi phin kha "Khaw-e" a ci ae'. Mithya phin kha "Pynthing" cite ko ae'. Laesakunaw um nan sah cite "Noe" cite Paw Khua Ming nynh a rae.
(10) Tingsi Khua Ming lee hawte ka lee ze, liapung paenaw khe toidung hae nynh oun ho hae ngawrei kae so...... (Khuatua Rang Kia hlaw).
(11) Zo bawi balyn laeze thaan huapaw Tingpaw Vazu Pum Pum paaw tuh minthaan sah hua la paw nou..... (Tingsi Da Da).
(12) (a) Ah Zo ccaky hynh phe rae vae, Daw Pum Pum paaw nyn.... Miraw ccaky te ah Zo ccaky hynh khyzaw balyn ria oh lou....... (Ramsae Naw Tu hlaw). (b) Luithang Vazu a ccianaw lang a nae vae, thingno lanze aa, ngedan hin lah ii.... ci lan nynh ka rypaw ou..... (Ramsae Naw Tu hlaw). (c) Tingsi Khua Ming tuh a rykuh leipaw ou..... Zo ram hooynaw lang puikhung laansaw Zekung khua cia a dia nyn...... (Ramsae Naw Tu hlaw).
Syntaw: Zawthaw ccungccaw nynh hynhte a houpaw ka muih tuh aphu phemaw ka esah.
(13) Minphuin hooynaw ka rypaw te ka cceih kho leite Zekung khuapi vae ning maw ka dia lahyn...... (Kamaw hlaw).
(14) Tingsi Khua Ming tuh Pachia nawpaw nynh ka thua ou...... Matupi te Rezua khopi kha yn rae sah nyn kae tuh..... (Kamaw hlaw).
(15) Ramccang pavaw heize a buate ou..... Zo ram hooynaw lang Tingsi Khua Ming tuh nithua, niccaw leih zou nou..... (Sazaeci Tha Le hlaw).
(16) Khyzaw bawi laku khuaning lang a pawpaw ou..... Luithang thingno, kaephua Khua Ming tuh a tae kho cih ae' zawtou...... (Lungngo Van Hu hlaw).
(17) Luithang kua nynh oun saab balyn te...... ou..... Tingpaw Vazu apu balang tuh kae phah cih zawtou...... (Lungngo Van Hu hlaw).
(18) Miraw siainn kae typaw Daw Pum paaw, Tingpaw Vazu khyzaw vawkaw cia na thaan zah na taw lan cia...... (Lungngo Van Kung nung hlaw).
(19) Kae ngaenawpaw Miraw bawi khua khyzaw nolung kya tua lan vazu na lya-e kha ou..... (Lungngo May Saw nung hlaw).
(20) Vawlae Mocco na lo lya hawkhate nolung ae' hanlan melangnua nan vae lah ii, na min roh zya...... (Lungngo May Saw nung hlaw).
(21) Lezinpian te maethe pya lya ae' ze Matupi khua ze khuaning sawpaw a lo lya Pum Pum nung muih leite...... (Lungngo May Saw nung hlaw).
(22) Ccathya balyn te a lokuh cih ae' zawtou...... Zo ram pynpi mit awsahpaw Tingsi Khua Ming tuh pise rou.... (Lia Lwin).
(23) Khyzaw bawi te kae luakuh huapaw mawtaw laanpi te Miraw siainn tuh Tingsi mamin lang tang vae.... (Lia Lwin).
(24) Saccaw kaephua a lo rou ae' paw ou..... Saepaw kaw bang, kuarang kaw bang ae', Saccaw kaephua nung kaw bang ae'....... (Be Be hlaw).
(25) Ccungte kaephua kaw te nynh ming ae' tuh leih thaan ae' ou....... thansyn ho te Lungchialaenoi khua pyn na aw sah vae...... (Rezua myo yn thuakhae cite a thae lya-e hlaw, 23.6.2002, Me Ki nung hlaw).
(26) Dikari kha ka law bua zeso ou.... Zekung khuapi khe khuaning sawpaw ka lo bua cihpaw lahyn (Kamaw hlaw).
(27) Ah min ccyntho te ah thae boi lei oh paw nyn, ry lei ccungccaw Mang Kia ccapaw Khua Ming laanpi nynh yn cceih cih..... (Sungpi Sa Lia hlaw).
(28) Liaccaw ae' kyaze khoitui a lopaw ou..... khyzaw bawi kya tuh arukaesin lopaw Pum Pum paaw ou...... (Lungring khuabawinung Noe Ngo Nung hlaw).
(29) Sung-uu leihzaw te leih luungmung ae' paw kae luung bua sah lah, vole sangpaw hin Pum Pum paaw tuh..... (Rev. Saw Mung hlaw).
(30) Pachia thehooy Zo ram teekhaepaw khaw, Zotung minphuin vaawlang suikhua thua lan oun hoypaw nyn..... (Rev. Saw Mung hlaw).
(31) Tingpaw Vazu ka pu Khua Ming tuh phya kho lanpaw thua khyh, Lungchialaenoi Zotung khuapi na rae nynkae tuh ou..... (Rev. Saw Mung hlaw).
(32) Khyzaw bawi te Salan Zipe zung kae thua tuh Tingsi Khua Ming tuh pise rou..... Tingpaw Vazu.... (Lungring Le Thah hlaw).
(33) Zotung minphuin ka sungsah keiccuze...... ou..... ccungccaw laku ze ryachiccih huapaw lante ka um vae...... (Kamaw hlaw). (1) Pawcce hynhte ka phuaku cize; Pynsaw hooynaw kha ka tua lan zetuh 9 + 10 kha po ka awkuh cih zah Zipe, Mangki rya law lanpaw kha riri a lang. Miraw she tan 7 awpaw tuh Vonthoh, tan 10 a awpaw ze Mangki cia a ryalaw kaepaw kha a phungpaw vae. (2) 1951 lya; Palih bawi lang vualeih te yn ko ae' zah kriccawbuu ka cciataw ry khyh zah ka mya. (3) 1955 kum khe Zekung palik Mangki nynh Bo ning te palik lang tee bua yn ci zah, Zotung kriccawbuu kha ka poutaw ry khyh zah atu hynh nyababi lante ka um.
(B) She Thaw Hlaw
♬ ♬ ♬ ♬ ♬ ♬ ♬
(1) Tingsi Kriccawbuu Nynh Yn Cciaduenawpaw Hlaw
1. Ah Zo muavaw Pachia maeccaw a la aw typaw nae thua vae tou lungtua maehooy pawkaleih lang Pachia nynh zungzae te ae la bawm vae sah lah, zungzae te Pachia bawmnaw tuh na kya la um sah.
Lianaw: Rang ccavae lungtua maehooy pakaleih lang, rang ccavae imua, liaccaw, ccangvae oun haw sah typaw, ah Zo pynpi e Kriccaw ae' kae thonawpaw, pou bawipaw lungtuate na ranlang kuit kae la kyng.
2. Kae thaw tynnaw, kae ngaengangnaw bawipaw, ah Zo ram elang saduh leih na thawkuhpaw te vyavya a aw takaw ah Zo ram kya, lungthang leite a awnaw lang oun la zuapakuh.
3. Khuazinaw ram awkhua nizyn hawte awpaw, ah Zo minphuin khuazi ram kya aw typaw, Pachia ccaci na tunaw Zo ram minphuin kya, khuaning hawte ah Zo mua vawlan hin paw sah.
4. Kae Baebuccaw, kae Zo ccaw, kae Zo hlaw bawipaw, kae min awnawpaw, kae naw uanawpaw lou, ah Zo mua vawlan Pachia maeccaw awsahpaw, na kya hiinhooy hythua lungdaenaw um sah.
d m s s s, l s m r d, I d´,
d I s s s, s l s m r d r,
d m s s, s I s m, r d l d´
t l s s, s l s m r f m r d
Lianaw ------------ s, d d d, d r d l, s, m s,
s l l d l s m r d r, d m s s s l s m r d l d´
d´ l s s s l s m r f m r d.
(2) Lungngo Kriccawbuu Nynh Cangtah Lang Ka Ccia Lyaze Yn Dohawnawpaw Hlaw
1. Aening Zo ram lungkhu kya maeccaw hawte a awpaw, (ning nan oh)², Kriccawbuu ae'.
d r m r d m s m r d m m r d, d d d, d d d, d d d, d s, d
2. Sazae lunghawpaw, lungnepaw (kae ning lan khyh)².
3. Zo ram na phu-enaw khuaning nizy nebaleih lang aw lah
s m f s, m d r m, d t l s f m r d,
(3) P.C. Za Thaw Nynh Yn Phuapaw Hlaw
" Zo Ccaw Raetu "
1. Kaepi kaesing kaw laeze mah a phu nou....
Ccungte kuarang kaw laeze mah a phu ung....
Zotung minphuin ae' hanlan cite Zo ccaw nae raepyapaw hynh...
Na tuanaw te na muihnaw koukaw langmaw hang....
Tingpaw bawiccaaw Tingsi Khua Ming hummou a phah ngaw....
Zo ccaw nae raepyapaw thanenaw hynh ho lanze laansawrua te ccanawnung te kykuh kho thua....
Miraw handphone te mah kykuh kho, Internet te kykuh kho mah thua...
2. Pynccei meilan nuanaw ccyh nae vae zema...
Zo minphuin ae' hanlan rho na pyasya vae....
Zo ccaw oun raepahtupaw cite zawthaw ae' nynh nynaw lang Tingpawlaenoi Tingsi Daw Pum paaw cite Zo hlaphua te VCD kyahin kae paw sah hin lou....
(3) Paw Ling Boi (Lungngo) Nynh Yn Phuapaw Hlaw
" Pachia Nawpaw Paw Khua Ming "
1. Pachia nawpaw, Zo ram hanlan, popaw Paw Khua Ming, kae Zotung ram, awnaw elang, laanpi hung typaw, a ccyh te ninsaw ccciakhae vae haw, tawnaw ccyh nae vae...
(Kae hysah khyh, a paw nang lanpaw).
2. Isare ae' awnaw hanlan popaw Solomon haw, aening Zo ram awnaw elang popaw Khua Ming kum a ccyh te ninsaw yn thang vae ze, ho lan phungpaw haw,
(Kae hysah khyh, a paw nang lanpaw).
3. Pachia raepaw, Zo ram mua mah, a paw ee mynkhuh vae, ccaawno ae' mah, laansaw ramccang, awnaw muih vae ae', ccaci vuatu, Khua Ming sawsang, hythuanaw ccing vae,
(Kae hysah khyh, a paw nang lanpaw).
*********************************
Bya Lante Yn Phua Ae' Paw Thehooypaw
ヅ ヅ ヅ ヅ ヅ ヅ ヅ ヅ ヅ ヅ ヅ ヅ ヅ ヅ ヅ ヅ ヅ
(1) Haekhaw siabawipaw Chester U. Strait nynh, "Paw Khua Ming tuh Laimi thua lan khyh, myarya haw, Lai ram kya kum 22 ka um vae, amaw hawte a hawpaw ka muih boi khyh," cite Rev. Za Ling (Sataw khuapaw) nynh 1939 kum khe a ho.
(2) Falam sazaeci Shin Pe nynh, "Zo ram kum 20 ka um vae, Khua Ming hawte a hawpaw ccungccaw ka muih boi loh khyh," cite sazaeci Hei Cin kha 1941 kum kya la hopya.
(3) Dr. Ba Ohn (Sineichoke, Rangon) nynh, "Matupi myone parliament ryngpaw Paw Khua Ming hynh Vae bya phe thya sah lah zetuh Vae ram kyahin hum nynh mah tae lan khyh," cite Vonci U Sin Thang kyakhe 1960 November 27 lya la ho.
(Syntaw: Zotung minphuin nynh sawtuanaw lang Paaw (Father of Zotung) cite yn ko ae'. Te, ccangpaw bya te yn phua ae' paw thehooy yn ho ae' paw lu 10 tuh ka zei vae khyh, pokuhpaw lo cih.)

Zo Raetapaw