Zotunghae nynh a boihae ze a boipaw zu te vaw nynh khophung lia kha lahae zah mih lu kya a voi kuhae. Pise nynh vazu soi a huing kubia. E khophung te vazu soi a lawkhia kuhaepaw hynh phung paw a ung Akaw lang e hawte nynh thua.
Khuing…. Langmaw lyaze lung aenung (nung aenung) nynh ccapise lu 2 a sah. Atawccapaw min tuh Paw Tang Phu , a neitapaw min tuh Paw Tang Zae a cihae. Zu la hoihae zah mih uhccaw parya a unung te a neitanung parouh la hoi kuhae. Atawccanung min tuh Noe Lang Si, a neitanung mintuh Noe Lang Dang la cihae. Innkheih lungkhu tuin mih nung ryte lu 5 te pong la ung kheihhae.
Mih vawpawhae tuh loo la phohae zah loo lang tuin palei la ryahae. Mih nung tuh a monunghae ryte innvaw la ung kheihhae. Mih zuhae nynh boei la kua pahae zah he la phiahae tuh loo lang mih vawpaw kalan khe zuby ah lanawhae. Zuby elang vaebu kha ccaw te ccanghaphung pyhae zah ahmia lang maetou la thung pyahae. Mih vawpawhae elangpaw tuh ccatang bu te awtui la thung pahae zah “Boei phe kae phia vae, inn lang oun thua ccavaehaesah” cite bya la tawhae. Zuby nynh ccatang bu te awtui kha amaw nynh ccapheih la ae zah mih vawpawhae kalan ccawbu, ccanghaphung te maetou kha la pyahae. “Nae zuhae nynh zi haw, zi kuin oun rya hinghaesah, ae ci oh” la ci pyahae. Tetuh loo lang palei la rya vaehae. Mih zuhae nynh dou-ang bua la raw kuhae zah he la phiahae te zuby tuh bua la naw ngaethaehae. Vaebu mah langmaw hawte bua la tunghae. Zuby nynh a thua huapaw vaebu tuh ccapheih bua la ae zah ccawbu te maetou tuh bua la thuakhae pyahae. “Zi haw, zi kuin oun rya hinghaesah, ae ci oh” cite bua la hopya ngaethaehae. Zuby nynh a thuapaw vaebu ae khylang cite palei la linghae zah loo tuh palei la rya vaehae.
Tetuh mih zuhae tuh mih thing phe riakhing, mih ngae phe la myng vaehae. “Oun ry vaekhyhae zah te ngawrei oun thua vaekhyhae, ah inn lang sya ah ki vae” la ci kuhae zah boei te dou-ang tuh la nung pasyahae zah mih khua lang dydyh la ccue vaehae. Mih vawpawhae tuh mah loo ryarytae vae khyhae zah “Pawpaw te thua zemah inn lang thuade ccavaesih” la cihae zah innvaw he thuahae tuh mih zuhae tuh phe la ccue vaehae. Mih nung tuh “Teimou ung hae” cite la khiahae zah mih nung nynh “Zuby palei ae kosah ozah, nae thuavaekhyh ozah , oun ry vaekhyhae zah tengawrei oun thua vaekhyhae cite tuahae zah phe ki vaehae” cite mih nung nynh la ho pyahae. Tetuh mih vawpawhae nynh sohsoh la dehuihae tuh mih nulang te halaw he muihhuihae zah “Pou… Si Nung te Dang Nung, khekhe beih oun la ngawtua oh” cite he kohuihae tuh, mih zuhae nynh “Kaening tuh nae ry leivae opaw” cihae zah mua pou khung lang ccuetaw vaehae.
Tetuh “Thuakho vaekhyh hynsa” cihae zah ccue te ccuekhawhae zah laanpi kaethung kya khuaning phe sonaw kyakhe lukheih nynh “Thing” lang la tang, lukheih nynh “Mynlyh” lang la tanghae zah la buh vaehae. Mih zuhae tuh tuh e mynlyh kya he la thuahae tuh a neitanung nynh “A u, e mynlyh kya hein haeung hingsih ii” cih zah a unung nynh “Mynlyh thua khyh, Tang Phu te Tang Zae nynh ah thuahae” cipah zah po bua ccuehae. Tuin te bua ccuekhawhae zah lukheih nynh tui lang tangpah zah lukheih nynh due lang bua la tang. Tetuh paw kyate cceih vaekhyhae zah a neitanung nynh due la lui loukaw tuin a unung tuh roh la kyng vaehae. “Ah inn lang nynh ki langvae” la cipahae zah a neitanung tuh khuraw phe la zua vae. “Nge lang phe tang vaecih” cite phe la mya vae.
Tetuh ah vawpawhae nynh “Ah ung kheihthya vaelang khyh ozah, nangning lu 2 hynh ribung lang lukheih, khophung lang lukheih oun tang olah, kaening lu 2 hynh vazu lang lukheih, saesia lang lukheih kae tang cih zah boipi nin kyaze tung kuhuavae osih ii” cihae zah a unung Noe Lang Si tuh “Khophung” lang la tang zah a neitanung Noe Lang Dang tuh “Ribung” lang la tang vaehae. Mih vawpwhae Paw Tang Phu tuh “Vazu” lang la tang zah Paw Tang Zae tuh “Saesia” lang la tang vaehae. Te ribung (Noe Lang Dang) he oun paw tuh ahpaw kha va-aw nynh phe zu. Va-aw tuh hynh te a ho pya. “Ka rang kya e ahpaw kha zu lah ka sangsoi khatuh vazu te siasae elang hang pahae” cipah zah va-aw nynh pong la zu vae. Tukeiccu nynh a boihaepaw nynh “Ribung tuh puimaw nynh phe ae vae” cite la lah bua vaekhyhae. “Ribung tuh va-aw nynh phe ae vae, saesia mah lahnang osih” cihae zah lawkhia ryvae khyhae. Khophung te vazu soi rou nynh a lawkhia vaehae. Tukeiccu ze “Boipi nin ze tungku vaesih” ah cikuhae hawte ah boihaepaw nynh Khophung te vazu soi a lawkhiahaepaw tuh Paw Tang Phu te Noe Lang Si ah tung kunawhaepaw nynh thua.
Aboi lyahae ze ngalyngpatui ah nia lyahae law ah sahaepaw tuh:
“Saesia vazu…… Ngalyn lynbe (sawbe)2” cite tyng khua kuhae zah a sah pyahae.
*( Ngalyngpatui cipaw asuilang na nyh leipaw nae khia kho.)
