-
2.4K Views 0 Comments 0 Likes 0 Reviews
1. ZoTung Kriccaw Diamond
Jubilee
Zotung ram tangpali siaingnn hynh 1926 Rezua khua kya nynh a um tou, thuasalama1927 te nynh siainn kae hae. Sayaci lang tangtoupaw tuh U Zam Bik, Satahpaw nynh thua. Lungngo siainn sayaci lang tangpaw U Sang Hnin tuh Rezua lang ae nawekuh zah 1933 kum Rezua khua siangimua hae kya Pachia thehooypaw bya a hopya hae, e ccyh lya Pachia bya a thaepaw siangimua hae tuh Paw Khua Mying (Tingsi), Paw Vo Lung (Siangaw), Paw Ccawe Taw (Thawlang), Paw Kae Sung (Rovaw (A), Paw Mung Khung (Langly), Paw Uk Sawe (Siangaw) hae nynh thua hae.
Sayaci U Sang Hnin Lungngo khua um lyaze Pachia bya ho zah a thae haepaw zyntu hae Paw Za Tin te a ban hae hynh mah Pachia a zyn hae, thuasalama tyn khyh hae. Rezua sianginn te kriccaw lang a tang haepaw zyntu hae hynh mah tyn khyh hae, thuasalama e hae laku kyate Paw Khua Mying hynh po tyn zah Kriccaw lang he tang te Pachia thehooy bya ho lang khua a ccung. 1934 Flam khua Miraw sianginn kae zah 1934 November naw ningnaw rhawkaw tuili kya U Pau Za Kam ryte siangbawi Dr. Cope nynh tuipinaw a pya.
Tukeiccu Zotung ram Pachia ccacci ccaw tounaw Rezua sianginn kyaze 1933 kum Pachia bya a thae haepaw ccungccaw hae laku kya Paw Khua Mying tuh atunin cia tyn zah Pachia a zyn takawnaw te kum 75 acih vae.
Rezua khua kya Pachia ccaci ccawnaw kum langte thuasah, Pachia zyntu ccungccaw (Paw Khua Mying) langte thuasah Zotung Kriccaw tuh kum 75 cih vae zah Diamond Jubilee aphah vae.
2. ZOTUNG MIPHUIN KYA
PACHIA THEHOOYPAW BYA
Laitlang pyngpi kya Pachia ryalawnaw hynh do lanze, American siabawi hae tuh Chin ccungccaw hae hanlang Pachia phung oun la hopahtu hae thua hae zah, Matu hae, Mara, Mindat te Kanpelet ram hae tuh minphuin ccang hae nynh ccia nuakute Pachia phung kha hopyaku athua. Thuasalama Zotung miphuin tuh minphuin ccang hae nynh ccia nua kute hopyapaw thua khyh. Haka te Pachia phung ho haepaw hynh mah Rev. Za Ling holeite Zotung niccaw lang thua boi khyh hae.
1930-38 kum kya siabawi Dr. Cope te Strait tuh Rezua a thua hae, thuasalama Pachia bya ho khyh hae. Tukeiccu Zotung tuh Zotung miphuin kya maw te Pachia bya hopyakupaw nynh athua. Zotung ram Pachia ccacii vua ty haepaw hynh Baebu siainn kae maw te Pachia rya a va laah vae hae.
Rev. Sa Lang
Rev. Sa Lang hynh 1942 kya Sataw khua khe Rev. Za Ling kya phung te hlaw a ccangkuh. Tukoute Thantlang pee Farawn kriccawbuu nynh sah kheit kia 5/- te lakhah pya hae zah Pachia ryalaw a tho.
Rev. Sa Lang tut 1950 January 14-16 khe Hakha kya ordination a mawe. Rev. Sa Lang Pastor a mawe maw tuh Zotung hynh Hakha Baptist kriccawbuu a thua keiccuze Rev. Za Ling nynh dobia te ccia nua athua.
Rev. Salang tuh, e ccyh kya Zotung nithua, niccaw, thalang, lialang khuaccung zah Pachia bya a siakhae. Hynh ccyh lya tyty ahoykupaw tuh Rev. Lo Kung nynh thua. Zotung ram Pachia zyn maw hae, innccung thuasah khyh hae, a sarya hae, a nuinse hae, ae-nia leite a um ccang hae patae um. Atu nin Zotung ram Pachia ryalaahtupaw pastor te kriccaw piccan hae hynh Rev. Sa Lang ccaci cci nynh ah thuakuh.
Rev. Ku King tuh 1952 November (23) Tuibing meeting khuakhannaw te Pee Thaw khua khua sari hanlan sazae lang a khan hae. (Pee Thaw khua khua sari cipaw tuh Rezua, Sawti, Ramsae, Etang, Tibing te Thandia hynh nynh a thua hae).
Rev. Sa Ting tuh Rezua pee hanlan sah kheit ze kia 5/- te Tuibing khuakhannaw 1952 November (23) te a khan hae.
Rev Kho Thawng tuh 1951 Mindat pee Tawenan khua kya tazaehaw lang a khan hae.
Rev. Lo Kungtuh 1953 December (14) HungLae khua te hlaw sazae lante a khang hae.
1955 December (8) Hinthang khua khuakhannaw kyate Rev. Khe Hang, Rev. Ca Thang, Pastor Sia Inn, Pastor Za Tou te Pastor Ho Ki kha tazaehaw lang a khan hae. Siangaw Phya Thang kha sawsang sazae lang a khan hae.
3. ZOTUNG MINPHUIN KYATE
BIBLE SIAINN KAE TY HAEPAW
1. Rev. Kho Thawng
2. Rev. Sa Lang
3. Rev. Ku King
4. Rev. Sa Ting
5. Rev. Khe Hang
6. Rev. Lo Kung
7. Pastor Za Tou
8. Pastor Ho Ki
9. Rev. Kae Dawe
10. Rev. To Uk
11. U Daw Kung
12. U Hoi Cin
13. U Khe Bawi
14. Pastor Sia Inn
Rev. Kae Dawe, Rev. Kho Thawng te Rev. To Uk hynh Zotung Kriccawbuu kya Baebu siainn rung hae te ryalah khyh hae. U Khe Bawi, U Daw Kung te U Hoi Cin hynh mah Pachia ryalawnaw kya pa bua vae khyh hae.
Hynh ccyh lya siainn kae haepaw hynh kum kheit ze lonaw naw sari, kum pali cia kae thua zah, abang tuh kum thang cia a kae leipaw mah a um hae. Thuasalama ZBA BM nynh accinpaw lante riapya te pese hynh mah tuapya a thua hae.
4. ZOTUNG RAM PACHIA RYA-LAWNAW TE KHUAKHANNAW (1940-57)
1945 Hakha Baptist Association (HBA) Sethang pee Hose khua meeting te Tingsi U Kha Zae te Sempi U Khua Puih tuh tazaehaw lang a khang hae. 1951 HBA meeting Tingsi khua te Insein B.Th kae lang Van Bik kha vote a pya hae, tuin civoi kya siabawi John Son a thua.
5. 1952 NOVEMBER 23 TUIBYNG MEETING KHUAKHANNAW
Pachia kalan hlupaw hynh atolang lang laeze pum kheit zoisah hua lang zah, ryalahtu hae tuh tuh laeze mah azoi langte zuapya lang hae. Kriccaw hae nynh seinaw, zu-aenaw, nopi pise seinaw rae hae te, pastor ho hawte a zui ry leipaw tuh mih min ccazing kyate the lang hae.
U Khe Bawi (Lungngo paw) tuh beiknaw rya lah bua sah, siainn sazae kyate phua lang. Sazae Le Kah (Lungngo paw) tuh bungtu sazae lang sah kheit kia pangaw te khang thuasah. Lonawnin ccaboi kaw e ahlu tuh piccang nynh ccou sah cite kae khan.
Zotung kriccawbuu khuakhantu kawmati lang: Tingsi Khae Nawe, Sempi Lia The te Rezua Subedar Bawi Kung hae tuh kae po. Kriccaw lang tang vae paw nynh cciaccaw chiapyanaw lawki phung hawte ccia lei lang, nopi te pise kuitkyngku hae ze cciakia lang pise ze phua kia ning, nopi ze kia kheit naung hae sah.
6. 1956 SECCAE MEETING BYA-PAENAW
Sazae Le Nang tuh Zotung khua takyh khua ccungsah lah hlaw thui hae sah. Tingis Rang Um tuh C.E cciakhaetu lang kae po. C.E hlu balyn hynh a kalan ky lang. Kriccaw hae nynh civoi ccia vae ze, nopi pise pyngkheih lang rya kheih, itkheih lei lang. Kriccaw innbyn kya samaw dua lei lang, Kriccaw nynh poei tuanaw kya nizua patung cipaw cciasah lei lang.
7. 1957 NOVEMBER LUNGPHIA-LIA KHUAKHANNAW
Lungdua U Mang Law tuh Vae ram lang Pachia phung ho lang kae khang. Phua ccingsah lya a thuakhae bua leipaw tuh kum kheit ze kia haw kyaze kum kheit ze kia kheit naung sah cite bya kae pae. Kriccaw piccang hae tuh ahlu te do-oyh lang hae.
8. ZOTUNG RAM BAEBU SIAINN KAE LEITE PACHIA NYNH MANG HAEPAW
Paw Khua Mying
Zotung minphuin laku ze ccawthya toupaw, Pachia zyntoupaw te tuipi ing toupaw hynh Tingsi Paw Khua Mying nynh thua.
Pachia ryalaw nawlan Baebu sianginn kae khyh zah Pachia ryalawnaw ccazin kya pa bua khyh. Thuasalama Pachia nynh a hiinnaw mang zah Pachia beiknaw lante zemah, ukkunaw lante zemah alae lei lante Pachia nynh a mang. Tukeiccuze Zotung ram Kriccawbu nynh mah Paw Khua Mying tuh sawtuanaw pyate pese zemah thuasah tuapya bua te pya bua athua. Zotung ccaw a rae, Mattu ccauk Zotung bya te a leih, Zo hlaw ccauk oun raepya. 1953 kyate 1956 cia parlimen lang a tang. ZMBA Secretary (1957-59) lang oun tangpya.
U Khe Nawe (Tingsi) te U Lia The (Sempi) tuh Zotung kriccaw kya khuakhantu lang, Tingsi U Kha Zae te Sempi U Khua Puih tuh 1955 kya HBA nynh tazaehaw lang a khang hae. U Kha Zae tuh Ramsae khua kya, U Khua Puih tuh Ccungsung khua kya um langte a khan hae.
Le Nang (Tingsi) tuh Zotung ram khua takyh kya sofa (hlaw) a ccang hae. Daw Dung Nah (Sempi) tuh 1972 te Rungvaw khuraw (Daeding, Voiru te Suitung) lang Pachia thehooy bya a ho, Suitung khua kha kriccaw khua lang a rae. Kriccaw langte sawsang te khua a sak hae. Zotung ram kya Pachia nynh a mang buapaw nopi lu kheit athua.
U Ngun Uk (Lungring paw) tuh amaw zuakunaw te Pachia phung a ho bua. Hynh-e ccungccaw hae nynh Zotung minphuin kya a mang bua haepaw ccungccaw hae nynh a thua hae.
9. ZO-MATU BAPTIST ASSOCIA-TION (ZMBA) 1957-63
1957 January 3, Rezua khua civoi kyate ZMBA mawe athua. Hakha siabawipaw John Son tuh Rezua khua a thua. Hynh-e civoi kya Rev. Ku King ordination a mawe. Paw Khua Mying tuh ZMBA General Secretary lang a po hae. Rev. Ting Uk tuh Insein Baebu ccangku lang vote a pya hae. Rev. Sa Lang tuh Lungngo khua kya sisong um sah cite bya a pae hae.
Kawmati lang Po haepaw: U Sua Tu (Lungngo), U Lia The (Sempi), Rev. Ca Thang (Sempi), U Kha Zae (Tingsi), U Bawi Sung (Razua), U Raw Uk (Ccungsung), Rev. Ku King (Seccae) te Rev. Sa Lang hae hynh Zotung kyate kawmati lang po a thua hae.
10. 1957 March 9, Khuangan khua ZMBA Kawmati Meeting
Matu Baptist Kawmati: U Lung Bawi (Tawenan), U A Song, U Han Ling, Rev. That Dun, Rev. Ngai Tim, Rev. Pan Kun. Zotung Baptist kyate U Hoi Cin, U Le Van, U Sua Tu, Rev. Sa Lang, Rev. Sa Ting te Rev. Ku King hae nynh meeting tua hae.
11. ZMBA KAWMATI MEETING, TINGSI 1958 May 17
E meeting kya upadi a rae hae, zung ryalahtu a po hae, ccungccaw 31 meeting a kae hae.
President Rev. Sa Lang,
Vice-president Rev. Pan Kun
General Secretary Paw Khua Mying
Joint-Secretary Rev. Ngai Tim
Treasurer Rev. That Dun
Assistant Treasurer Rev. Ku King
Byapaenaw:Atu te Baebu siainn kae leipaw Pachia ryalaw kya khang lei lang vae cite byapaenaw a hoi hae. 1959 May 31, Kace khua civoi kyate Rev. Sa Ting ordination a mawe. Paw Khua Mying (General Secretary) tuh 1959 May 31 te hae-um thuasah lah, sisong hanlan Rev. That Dun nynh laah sah. ZMBA civoi tuh 1960 February 11 Tuibyng khua, 1961 February saw kya Tawenan khua kya tua lang.
1961 March 11 Matupi khua meeting kya Southern Baptist Convention kong a ho vae hae. Dr. Ngun Thawng (Teddim paw), vunthok U Ba Chit (Hakha paw), pinngia-uk U Kio Hlun hae meeting a tua bua hae, Zotung Matu piccang lunghaw phe ccing te meeting tua hae. 1962 January Hinthang khua kya Zotung lalouh te meeting tua haepaw hynh Matu hae nynh Hlimsang te ccia keiccu hae ze, Matu-Zotung phiaku lanpaw kong meeting nynh thua. Matu hae Baneng, Ngalen te Radui tuh Hlimsang a ry khyh hae keiccuze Zotung kya pasah bua lang hae.
ZBC meeting cceih lanpaw Rev. Sa Lang, Rev. Sa Ting te Rev. Ku King kha a po hae. ZBC meeting kya Zotung elang khokhu ccangkheit soh lang, ahmin tuh Dawccung khua kya ci lang cite bya a pae hae.
1962 February 9-10, ZMBA nyathya kou civoi Tangku khua byapaenaw: Hlimsang te a cceih haepaw (a pom haepaw) tuh kawmati lang po lei lang, 1962 December E.C meeting kyacia do tua ung lang cite byapaenaw a hoi hae.
12. 1963 February 2, Sempi Civoi
John Son siabawipaw a thua.
1. Rev. Lo Kung te Rev. Khe Hang kha ordination a pya hae.
2. Ngalen piccangpaw U Han Ling kha tazaehaw lang a khang hae, U Le Ban (Razua) tuh Falam Baebu siainn kae sah lah a rung te Pachia rya a law khyhze phua 500 a rung cih.
13. 1964 February 8, Ngalen civoi Bya-paenaw
Ngalen, Radui te Baneng tuh Zotung kya lehkhae hae zah a pa bua hae. Tukeiccu ZMBA cite a ko hae. Nopibu meeting tuh 1964 March 28, Lungngo khua kya tua lang, atu civoi kya nopibu thawlung mangnaw kong ho lang. Rev. Ca Thang hynh sah kheit ze kia 40 pya lang zah Ccungsung khua um sah. Kriccaw piccang ram rya oinaw (lawenaw) accozah kalan soh lang. General Secretary Rev. Ting Uk tuh Lungngo khua kya singsong um hing sah. Zo Hlaw ccauk nang lang, bia chih lang. A dotu lang hae Rev. Sa Ting, Rev. Se Kaw, Paw Khua Mying, Rev. Ting Uk te Rev. Ca Thang athua cih hae.
1965 February 13, Lungphialia civoi kya ZBC General Secretary Rev. Con Bil tuh a thua bua. Hynh-e civoi kyate Lungngo kriccawbuu kya thaekuseinaw um keiccu ZBA E.C hae mih lungvaw myarya a saw. 1965 October 10, Hinthang khua meeting kyate ZBA General Secretary Rev. Ting Uk tuh hae-umsah hae zah Rev. Lo Kung kha ZBA General Secretary lang a po hae. Hinthang khua meeting kyate ZBA ram kya area te um lang vae cite a ho vae hae.
1966 February 4, Khotua ZBA E.C meeting byapaenaw kya-e, pastor te piccang nynh ny leipaw te sethuh leipaw kha meeting kya thuakhae lei lang, pum haw pum ning ZBA fund lang, pum tarya hynh area kya mang lang zah, area thaw zyapaw bungku lang. Area ccangpangaw lante um lang. (1) Tingsi area kya Rev. Lo Kung, (2) Lungphialia area kya Rev. Khe Hang, (3) Hinthang area kya Rev. Sa Ting, (4) Lungngo area kya Rev. Sa Lang, (5) Seccae area kya Rev. Ku King te a phia hae. (Aphiakuh haepaw) Lungngo kriccaw hae kalan Rev. Sa Ting nynh cceihsah lah sawsang te mangkhae hae sah.
ZBA zung tuh Ccungsung khua um sah. Area ccangpaw nynh ccangpaw area kalan khuaccungpyaku leilan cite byapaenaw a hoi hae. Hynh-e meeting a kae haepaw tuh Rev. Sa Lang, Rev. Lo Kung, Rev. Ku King, Rev. Khe Hang, U Khin Lei (Seccae), U Lae Khaw (Hunglae), U Min Thang (Lungphialia), U Hin Bawi (Zesaw) te U Sua Ccung (Rezua).
Tukoute vaeningnaw area bua phiakunaw tuh 1984 Hunglae delegate te area nenaw: (1) Tuitah area, (2) Saraw area, (3) Voyphu area (4) Leihsaw area (5) Phiavaw area, (6) Singkhua area, (7) Leihsaw dung area, (8) Babu area, (9) Hunglae area, (10) Tingsi area cite minphu thua zah hynh ccyh lya local cipaw um loh khyh. E Hunglae khua meeting kya ZBC General Secretary Rev. Simon Pau Khan En a thua bua.
14. ZOTUNG RAM KRICCAWBUU PHIAKUNAW (1960-2008)
Zotung ram kriccawbuu phiakunaw hynh Ccungsung khua te nynh a phiaku ty, 1958-60 ccyh kya. Ho rypaw tuh kriccaw lang tang ty haepaw kyate buu ccang lang phiakupaw kha ho rypaw athua. Tukoute 1970-72 ccyh kya Zotung ram beiknaw kya lungloku leinaw um zah vawsaw myarya um. Pastor te kriccaw piccang hae nynh kriccawbuu hooyte oun cciakhae khyh hae cite accozah rya laah haepaw pa bua te, Zotung Kriccaw Remthui Buu cite minphu hae zah, thawte khuakhan meeting tuanaw a um. Thuasalama 1972 Hinthang civoi te kou hooy lante khua bua khan hae zah adae. ZBA General Secretary ccangpaw a po hae. Cciakhaekunaw athaw lante a rae hae. Tukoute Methodist a phiakuh. Beiknaw ccangpaw Zotung ram a tee vae.
15. ZOTUNG KRICCAWBUU PHIA-KUNAW TUH AKAWLAN HAWTE NYNH THUA
(1) Baptist 1933
(2) RCM 1958-60
(3) Seven Day Adventist 1968
(4) Methodist 1972
(5) Jahova Witness 1974
(6) EFCB 1977
(7) ZCC 1988
(8) Gospel Baptist 1988
(9) BCM 1996
(10) Evangelical 2000
(11) Full Pentecostal 2000
(12) A.G
(13) Taetu Buu 2002
(14) Reform Church
(15) Local Assembly 2007
(16) CJC
(17 Local Baptist
(18) ECC 2007
16. ZOTUNG BAPTIST ASSOCIA-TION ZUNG
ZBA zung tuh 1966 Khotu khua ZBA E.C khuakhannaw te Ccawpi (Ccungsung) khua khe sak athua. MBC nynh zung sak nawlan Kia 15000/- oun bung zah, Kia 5000/- te zung tuh sak athua. Rev. Se Kaw tuh ZBA General Secretary lante Ccawpi khua kya full-time te rya a laah vae.
1976 ZBA E.C meeting Rovaw (A) khua kyate Ccawpi khua umpaw ZBA zung kha Rezua lang bua nue hae zah 1976 July 24 nin khe Ccawpi e ZBA zung uccaw phuthyapaw miakaw kha marya te Rezua lang phu thua zah, zung inn te phuthya leipaw uccaw tuh Ccawpi kriccawbuu hae pya sya a thua hae. Rezua khua zung kae nawlan U Lia Thuai inn innkhan khan kheit kya sawpaw sah kheit ze Kia 20 te hoh thua zah, 1981 cia tuin kya zung kae athua. Tukoute ZBA area takyh te khoitang tua te, Kia 20,000/ te ZBA zung kha khan ning lante sak thua zah, 1981 te 1999 kyacia tuin tuin kya zung kae athua. 1999 te 2008 kyacia Rezua khua Longzae khua cikunaw kya taih-inn khan ning (60’ * 30’) kalan bua nueku athua. Aryngpaw ZBA zung tuh ZBA nolung hae hanlan cciatawpya sya athua.
16. ZBA KYA GENERAL SECRE-TARY RYALAHTU HAE (1957-2008)
(1) Zotung Matu Baptist Association (ZMBA) General Secretary hae tuh:
a. 1957-59 Paw Khua Mying
b. 1959-61 Rev. That Dun
c. 1961-62 Rev. Tin Uk
(2) Zotung Baptist Association (ZBA) General Secretary hae tuh:
1. 1963-65 Rev. Tin Uk
2. 1965-72 Rev. Lo Kung
3. 1972-76 Rev. Se Kaw
4. 1977-87 Rev. J. An Sung
5. 1987-90 Rev. Raw Muih
6. 1990-96 Rev. Zotung Zo Kaw
7. 1996-99 Rev. Sua The
8. 1999-2000 Rev. Twa Man
9. 2000-2005 Rev. Kaw Kung
10. 2005- 2008 Rev. Peter Nay Maung
17. ZBA STAFF HAE (DEPART-MENTS)
1976 Rezua te ZBA staff (department) hae tuh hoi thua zah, mino, nopi, C.E, E&M (Evangelism and Department), ccazi te piatae cie ZBA zung ryalahtu hae a um tuh lungpaw um zah zung kya beiknaw kya mah asaw-amuin oun um. Ryalawnaw mihmaw department raveih te kum kheit hanlan oun soikuh hae zah, minobu ccintang, nopibu ccintang, C.E ccintang, E&M nynh khua te area kalan khuaccungnaw program a hoi hae. General Secretary nynh aho-abounaw kya khua a ccung.
Hynhte ryalaw oun thokuh tuh, Zotung ram kriccawbuu hae mah mih lungpaw zah ram mah a phu-e. Pachia lungry mah athua, zung ryalahtu sawtuakunaw te thawccinawkunaw mah oun um.
1) MINO RYALAWNAW
ZBA ram mino department hynh masaty um typaw mino aciku maw C.E cite min a phu hae, tuh ccyh lyaze Tingsi Ram Um nynh a cciakhae hae. 1974 MBC nynh C.E kha mino lang oun rulae zah ZBA E.C nynh 1975 kum Sempi civoi te Rev. J. An Sung tuh full-time lakhah pya te mino secretary lang a khang hae.
1) 1975-76 Rev. J. An Sung
2) 1977- May saw cia Rev. Lo Kung
3) 1977, May – 85 Rev. Siang Kung
4) 1985-86, October Rev. Lang Uk
5) 1986, Oct. – 87 Rev. Zotung Zo Kaw
6) 1987-1990 Rev. Kae Kaw
7) 1990-1993 Rev. Kaw Kung
8) 1993, May – 99 Rev. J. Peng Shwe
9) 1999-2000 Rev. Ba Oo
10) 2000-2002 Rev.Thawng Khae
11)2002-2005 Pastor Thawng Za Thang
12)2005- 2008 Pastor Cia Maung
2) E & M DEPARTMENT
1) 1981-83 Rev. Lo Kung
2) 1983-87 Rev. Sua The
3) 1987-90 Rev. Zotung Zo Kaw
4) 1990-93, May Rev. Lang Uk
5) 1993, May-95 Rev. Ho Mung
6) 1996-2002 Rev. Vang Pe
7) 2002-2005 Rev. Ling Bawi
8) 2005-2008 Rev. Van Uk
3) C.E (Christian Education)
1) 1981-85 Rev. Lang Uk
2) 1996 May, -99 Pastor Nun Ding
3) 1999-2002 Pastor Phua Paw
4) 2002-2005 Pastor Tun Kyaw
5) 2005- 2008 Pastor Khin Ma Myint
4) NOPIBU RYALAWNAW
1.1983 May -87 Pastor Sung Thein
2.1987-96 Pastor Shwe Shwe
3.1996-99 Pastor Sung Thein
4. 1999-2002 Pastor Nun Din
5. 2002- 2008 Pastor Ku Mi
5) ZBA CCAZI
1. 1991-95 U That Min
2. 1995-99 U Le Thin
3. 1999- atu cia U Lia Za Cin
6) ZBA DRAVUN
1. 1977-79 U Nin Thawe
2. 1979-82 U Le Dia
3. 1982- atu cia U Pe Nin
7. ZBA RAM THAW RYALAWNAW
Rev. Kho Thawng, Rev. Kae Dawe te Rev. To Uk hynh 1950 te Mindat pee lang ram thaw ryalawnaw kya ryalah haepaw nynh thua hae. Sazae Mang Law (Lungdua) hynh mah Zungnah khua te Lavoikung khua kya ram thaw ryalawnaw kya a pa bua. Tukoute Noe Thoi Ni (Daedin) hynh mah ZBA nynh ram thaw ryalawnaw kya Lavoikung kya a naung haepaw nynh thua.
Zotung minphuin a umnaw hae Rungvaw khuraw lang hynh Daw Dun Nah nynh ram thaw ryalawnaw te kriccawbuu lang a raenaw, Lungring Ngun Uk nynh Mindat pee Tawenan lang ram thaw ryalawnaw liate muisaw patae a kyng. Tukoute 2003-06 Zotung minphuin Vae ram bialae lang um haepaw Kalay, Tahang, Pintaw-oo te Keko lang hynh mah ZBA nynh pastor Nun Din kha Pintaw-oo, Rev. Lia Mung kha Tahang, Pastor San Naw kha Keko lang shawpya athua. Hynh-e hynh mah ZBA nynh ram thaw ryalawnaw nynh thua.
8. ZBA NOLUNG (ZOTUNGMIN-PHUIN NGAWRAW) DO-OIHNAW
Zotung ram kya nungpaaw hoi lei haepaw ngawraw hae hynh masaty ZBA nopibu hae nynh khuakhannaw kyate oun poupaw thua zah, 2000 kum Hunglae khua ZBA BM meeting kyate nawccaw thua zah, 2000 May 20 nin Rezua khua khe tho athua vae. Ngawraw hae ci leite ZBA Nolung hae ci thua zah, a min hynh "Docus Children Home" ci athua. Ang hyngpahtu lang haepaw nopi lu kheit te sawsang phunghopah lang haepaw pastor lu kheit naungpya athua hae. Zyntu hae nynh mih sisua pyanaw liate 40’ * 20’ te anglae-inn (taih-inn) khan thum te sak lya cciamang nynh thua.
ZBA nolung kya ryalah haepaw tuh akawlan hawte nynh athua:
1) Pastor Nun Ding (Cciakhaetu, 2000-2002),
2) Noe Di Ngo (Do-oihtu, 2000-2005),
3) Pastor Ku Mi (Cciakhaetu, 2002-2005),
4) Noe Zing Hniang (Do-oihtu, 2004-2005),
5) Rev. Ling Bawi (Pastor, 20005-2008),
6) Daw Ngun Daw (Do-oihtu, 2005-2008).
ZBA Nolung Min Ccaziin (2007)
01. Paw Ling Bo U Sae Khung Ccangcceih ZCC
02. Paw Nay Lin Aung U Aya Maung Rezua Baptist
03. Noe Paw Aye U Lia Ling Thesi Baptist
04. Paw Thung Bawi U Se Thung Kaelung Baptist
05. Paw Kae Thang U Phae Uk Panvaw RCM
06. Paw Chit Maung U Hoi Ccung Hingthang Baptist
07. Noe Cho May Win U Khin Maung Rezua Baptist
08. Noe Maw Li Khain U Cung Ki Khotua Baptist
09. Paw Ki Za Lia U Mang Sah Rangsae Methodist
10. Paw Zung Tin Sang U Tung Khuh Thangdya Methodist
11. Noe Nge Thoi Ni U Le Mang Lungngo Baptist
12. Paw Ram Thar U Za Lah Lawvaw CJC
13. Paw Thang Naw U Raw Lia Votui Baptist
14. Paw Islom U Khua Pheih Lotaw Baptist
15. Paw Aung Kyi Oo U Khin Maung Rezua Baptist
16. Paw Aung Htet Lin U Aye Maung Rezua Baptist
17. Noe Thua Nin U Tung Uk Lawvaw Baptist
18. Noe Ni Ni Ling U Ling Naw Rovaw (A) Baptist
19. Noe May Hla Win U Sah Bi Lotaw ZCC
20. Paw Ma Duh U Saw Kung Ccangcceih Baptist
21. Paw Ro Thang U Bawi Le Tuibyng (A) Baptist
22. Paw San Tun Oo U Ling Naw Rovaw (A) Baptist
23. Noe Za Hnem Em U Raw Bik Ccaho Baptist
24. Paw Ko San Oo U Lung Tua Zesaw Baptist
18. ZOTUNG BAPTIST NITHUA TE NICCAW PHIAKUNAW
1996 Ccangcceih khua ZBA delegate kyate nithua te niccaw phiaku lanpaw hynh ho athua vae thyhhawte 2004 Kaelung khua ZBA BM meeting kyate Zotung Baptist nithua te niccaw phiaku athua vae. Nithua lang hae tuh Zotung Association of Baptist Churches (ZABC) cikuh hae zah mih zung Ramcci khua nynh a um. Cciakhaetu hae: Rev. T. Ngun Mang, Rev. Rua Sang, Rev. Ca Lung te Rev. Yan Nawn nynh athua hae.
19. ZOTUNG CCAW
(Zotung Chin Literature)
Atunin Zotung ccaw hynh 1933 kum kyaze Paw Khua Mying nynh Roman alphabet te a raepaw ccaw nynh thua. Hynh-e thyhte Zotung ccungccaw nynh hlaw ccauk thuasah, Baebu ccauk thuasah, ccaw kykunaw kya thuasah mangpaw ccaw lang ae tang. Zotung Baptist Association E.C nynh mah Zotung ccaw tuh hynh-e Hlaw ccauk te Matu Baebu ccauk thyhte nynh mang lang cite byapaenaw a hoi. Hynh thyh hawte atunin cia atyng.
20. ZO HLAW CCAUK
Zotung hlaw ccauk hynh mah Paw Khua Mying nynh oun raepya.
1) 1952 Nanbah 215 apapaw uk 300 kha cycloster te la nang (rae) zah lasung lang amee leite a la ne.
2) 1958 Nanbah 250 apapaw uk 600 kha Hakha press kya a la nang hae.
3) 1967 Nanbah 300 apapaw uk 1000 kha Yangon khua te rae athua.
4) 1980 Nanbah 312 apapaw uk 2000 kha MBC publication kya ngia te Rev. Lang Uk nynh oun nangpya.
5) 1998 Nanbah 488 apapaw uk 2000 kha solfa te Rev. J. Peng Shwe nynh vaekheitnaw te vaeningnaw oun nangpya.
20. ZO BAEBUCCAW
1) Mattu Thehooypaw ccauk kha 1951 kum kya London Bible Society bungnaw liate Paw Khua Mying nynh oun leihpah zah oun nang (rae) pya. (1953 kum khe London Bible Society nynh Zo Byakin Thaw (N.T) leihkunaw kaw (permit) kha Paw Khua Mying nynh la soh zah oun la pya hae.)
2) Johan Thehooypaw ccauk kha 1967 kum te London Bible Society bungnaw te Rev. Se Kaw nynh oun leihpah zah 1972 kum kya oun nangpya.
3) Zotung Byakin Thaw (N.T) kha Rev. Kaw Kung nynh 1993-2003 kya oun leihpya.
4) Zotung Byakin Ryng (O.T) kha Rev. John An Sung te Pastor Lang Za Pum nynh 2007 kyate oun leihpya takaw hae. Rev. Peter Nay Maung nynh ZBA General Secretary a tang ccyh lya nynh thua.
21. ZOTUNG RAM BAPTIST KRICCAW LANG TANG TY HAEPAW TE
DAHANGKHAETU HAE (1933-2008)
1. Tingsi kriccawbuu Paw Khua Mying 1933
2. Lungngo kriccawbuu Ccang Zaw 1933
3. Votui kriccawbuu Za Tou 1936
4. Sempi kriccawbuu Lia The 1942
5. Tuilaw kriccawbuu Ku King 1942
6. Lungring kriccawbuu Ngun Uk 1945
7. Seccae kriccawbuu Raw Mang 1947
8. Tuphae kriccawbuu Zua Khua 1947
9. Thangdia kriccawbuu Pho Kung 1947
10. Zesaw kriccawbuu Tae Heih 1947
11. Rezua kriccawbuu Vua Khe 1948
12. Thawlang kriccawbuu Thang Hei 1948
13. Balei kriccawbuu Hoi Hah 1947
14. Sungpi kriccawbuu To Lang 1948
15. Lungphialia kriccawbuu Ae Tua 1948
16. Ramsae kriccawbuu Zae Lia 1948
17. Etang kriccawbuu Za Thang 1948
18. Tuibyng kriccawbuu Ce Sung 1948
19. Siangaw kriccawbuu Ta Zing 1948
20. Sawti (Ccawtui) kriccawbuu Co Heh 1948
21. Hinthang kriccawbuu Sa Ting 1948
22. Tuinia kriccawbuu Khua Kae 1948
23. Lungdua kriccawbuu Mang Law 1948
24. Kaelung kriccawbuu Hoi Hang 1948
25. Thesi kriccawbuu Zia Nue 1949
26. Hunglae kriccawbuu Ho Ki 1950
27. Aekaw kriccawbuu Daw La Ki 1951
28. Sesi kriccawbuu Mang Sae 1951
29. Rovaw (A) kriccawbuu Tu Ki 1952
30. Lotaw kriccawbuu Kung Lia 1952
31. Ccungsung kriccawbuu Khe Bik 1952
32. Ccangcceih kriccawbuu Lua Hung 1953
33. Raso kriccawbuu Mo Nue 1953
34. Nawbung kriccawbuu Thang Lyng 1956
35. Rovaw (B) kriccawbuu Le Mang 1957
36. Khoboi kriccawbuu Rae Mang 1957
37. Khotua kriccawbuu Pu Mang 1958?
38. Dawccung kriccawbuu Sia King 1961
39. Zawngnak kriccawbuu Pu Mang 1961
40. Langly kriccawbuu Chia Pe 1962
41. Ccawpi kriccawbuu Le Vang 1962
42. Lawvaw kriccawbuu Rang Zi 1962
43. Matupi kriccawbuu Mung Ccou 1967
44. Daeding kriccawbuu Sa Khaw 1972
45. Voiru kriccawbuu Sae Mang 1972
46. Suitung kriccawbuu Se Nue 1972
47. Ramcci kriccawbuu Kung Lia 1976
48. Angta kriccawbuu Lung Min 1990?
49. Seccae Ku King kriccawbuu Sua Khuai 1993
50. Gangaw kriccawbuu Lung Hu 2003
51. Pintaw-oo kriccawbuu Raw Nue 2003
52. Kalay Aungthitsa kriccawbuu Co Uk 2003
53. Tahang (Kalay) kriccawbuu Lia Soi 2004
54. Pintaw-oo kriccawbuu Lae Thang 2004
55. Ccaho kriccawbuu - -
56. Panvaw kriccawbuu - -
Hynh-e ccauk zei lyaze dokhiapaw ccauk hae
01. Zotung kriccaw Hakha Baptist Association kya um lya-e byanung (1945-56)
02. Zotung-Matu Association lya-e byanung (1957-63)
03. Rev. Sa Lang te Rev. Sa Ting Jubilee lya-e byanung
04. Rev. San Ling, Rev. Za Ling, Rev. Sang Fen te Rev. Van Lo Jubilee ccauk hae te khuaccungnaw hae byanung.
05. Rev. Khe Hang te Rev. Lo Kung byakhianaw
06. Siabawi John Son Chronicle, Chin missionary
07. Chin Centenary ram thaw ryalawnaw (1899-1999)
08. ZBA BM minute te ryalawnaw (1963-2008)
09. Paw Khua Mying nynh amaw konglang a zeinaw kya-e byanung
10. ZBA ram khua takyh kya-e pyng raveih Jubilee byanung
=================
Rev. John An Sung pyapaw
Zotung Minphuin Ram Kriccawbuu BIBLE SIAINN Jubilee Rev. Sa Lang Pachia
